Kosova po e izolon veten me mospjesëmarrje në iniciativa ballkanike

Kosova po vazhdon të refuzojë të marrë pjesë në nismën rajonale “Ballkani i Hapur” dhe kjo nga analistët politikë në vend, po vlerësohet si vendim i gabueshëm i Qeverisë. Artan Muhaxheri ka thënë për Radio Kosovën, se mospjesëmarrja e Kosovës në këtë iniciativë është për keqardhje pasi  BE-ja dhe SHBA po e përkrahin “Ballkanin e Hapur”.

“Kjo është për keqardhje për faktin se edhe BE-ja edhe SHBA-ja po e përkrahin këtë iniciativë dhe Kosova nuk është aty. Ky nuk është lajm i mirë për agjendën e evropiane të Kosovës”, ka thënë Muhaxheri për Radio Kosovën.

Analisti tjetër politik, Artan Behrami, ka thënë se fotografia e liderëve të Ballkanit Perëndimor pa praninë e Kosovës, është fotografi që nuk i duhet politikës së jashtme të Kosovës. Ai tha se me këtë qasje Kosova po e izolon veten në arenën ndërkombëtare.

“Kosova me kryeministrin Albin Kurti po e izolojnë veten në arenën ndërkombëtare. Fotografia e të gjithë liderëve të Ballkanit Perëndimor, ku mungonte vetëm Kosova është fotografia që nuk i duhet politikës së jashtme të Kosovës”, ka deklaruar Behrami.

Nisma për bashkëpunimin rajonal “Ballkani i Hapur”, e cila përfshinë Serbinë, Maqedoninë e Veriut dhe Shqipërinë, është marrë nga presidenti i Serbisë, Aleksander Vuçiq, kryeministri i Maqedonisë së Veriut, Zoran Zaev dhe kryeministri i Shqipërisë, Edi Rama, në tetor të vitit 2019. Nisma fillimisht është quajtur “Mini-Shengen” dhe parasheh lëvizjen e lirë të kapitalit, mallrave, shërbimeve dhe njerëzve midis tri vendeve. Përveç këtyre tri vendeve në samitin e sotëm si vende vëzhguese po marrin pjesë Mali i Zi dhe Bosnja e Hercegovina.