Borell: Rusia po intensifikon shtypjen e mediave të pavarura

Ai thotë se sipas raportimeve, më shumë se 7 mijë e 600 protestues kundër luftës në më shumë se 120 qytete janë arrestuar që nga fillimi i pushtimit rus në Ukrainë.

Lexoni më poshtë deklaratën e plotë të kryediplomatit evropian:

Censura mediatike e imponuar nga autoritetet ruse si dhe shtypja e protestave paqësore kundër luftës në funksion të pushtimit ushtarak të paprovokuar dhe të pajustifikuar të Ukrainës po përshkallëzohet në Rusi.

Dje, dy nga mediat më të njohura ruse, Echo e Moskës dhe TV Rain, u ndaluan, si dhe uebsajtet e një numri organizatash të tjera mediatike të pavarura. Sot, Echo e Moskës u likuidua. Këto media po heshten për dhënien e një platforme të burimeve dhe zërave që sfidojnë pamjen e falsifikuar të situatës në terren në Ukrainë, siç portretizohet nga qeveria ruse dhe rrjeti i dezinformimit nën kontrollin e saj, duke përfshirë kanalet televizive të kontrolluara nga shteti rus.

Sipas raportimeve, më shumë se 7600 protestues kundër luftës në më shumë se 120 qytete janë arrestuar që nga fillimi i pushtimit ushtarak rus të Ukrainës. Është thellësisht shqetësues fakti që aktualisht po hartohet një ligj nga Duma e Shtetit të Rusisë, i cili do të lejojë dënimin e atyre që shprehin mendime që devijojnë nga linja zyrtare e qeverisë me deri në 15 vjet burg.

Ne përshëndesim guximin e atyre qytetarëve rusë që guxojnë të kundërshtojnë publikisht luftën që Putin po bën në Ukrainë, pavarësisht censurës dhe represionit. Ne përshëndesim mediat e pavarura ruse dhe OJQ-të ruse që mbrojnë vlerat e demokracisë, sundimit të ligjit dhe lirisë dhe përpiqen të informojnë popullin rus për situatën në terren në Ukrainë.