Biden do të mbajë sonte fjalimin e tij të parë “state of the union”, i cili po pritet me interes të madh në të gjithë botën

Pak vetë e dinë që ky fjalim, që mbahet në Capitol (ndërtesa e Kongresit) në prani të të gjithë deputetëve (anëtarëve të Dhomës së përfaqësuesve e senatorëve), është në kuadër të një detyrimi kushtetues për të informuar Kongresin mbi gjendjen e kombit.

Kushtetuta nuk kërkon që Presidenti të mbajë një fjalim, por në kohët moderne Presidentët e kanë bërë të udhës që ta informojnë Kongresin e kombin nëpërmjet një fjalimi, që transmetohet nga të gjitha mediat e ndiqet nga një publik i madh.

Kjo do të jetë hera e parë për Presidentin Biden. Sikur të jetonim në kohë normale, fokusi i fjalimit do të ishte ekonomia e vendit dhe çështjet e brendshme, por ne jemi duke jetuar në kohë anormale. Prej më shumë se një jave, Rusia ka ndërmarrë një fushatë pushtimi të Ukrainës. Është një luftë e paprovokuar, që ka kapur në befasi gjithë botën, mbi të gjitha Perëndimin.

Është e qartë se ky do të jetë argumenti kryesor, ku do ndalet Biden-i gjatë fjalës së vet. Ai e ka bërë të qartë se nuk do ndërhyjë në këtë luftë, pasi ndërhyrja do ta shndërronte atë luftë lokale në një luftë botërore, por janë shtuar zërat që po i kërkojnë SHBA-ve të mos i lërë vetëm e të pambrojtur ukrainasit. Këta zëra janë më të paktë në SHBA sesa në Europë, por aleanca eurotlantike nuk është parë kurrë kaq e bashkuar sa këtë herë.

Gjuha kanosëse e Putinit që ka lënë të kuptohet përdorimin e armëve bërthamore, apo edhe hamendja se ky i fundit, me të mbaruar punë me Ukrainën, do të fillojë me Moldavinë e me vende të tjera të ish BRSS-së, mund ta bëjnë Biden-in të marrë vendimin për një përfshirje gjithnjë e më të madhe në konflikt.

Është bërë kohë që një fjalim “state of the union” nuk është pritur me kaq kërshëri, jo vetëm nga amerikanët, por edhe nga pjesa tjetër e botës.