INTERVISTË E PLOTË: Shkodran Ramadani

Analisti Shkodran Ramadani në një intervistë të shkurtër të dhënë për Gazetën Periskopi, ka folur për qëndrimet e Qeverisë Kurti nën rrethanat e reja ndërkombëtare. Ai ka komentuar deklaratat e Kryeministrit të Kosovës, Albin Kurtit, për rrezikun që mund ta pret Ballkanin Perëndimor, për përpjekjet për anëtarësim të përshpejtuar në NATO nga Qeveria Kurti si dhe për të ardhmen e dialogut Kosovë-Serbi, tani nën dinamikat e reja ndërkombëtare.

Periskopi: Kryeministri i Kosoves, Albin Kurti, është duke u deklaruar vazhdimisht për mediat vendore dhe ndërkombëtare rreth luftës në Ukrainë duke e theksuar se Ballkani Perëndimor është në rrezik, si i vlerësoni këto deklarata?

Shkodran Ramadani:

Deklaratat e Kurtit për Luftën në Ukrainë si dhe për mundësinë të konfliktit edhe në Ballkanin Perëndimor tregojnë që Albin Kurti po përpiqet që ta përshpejtojë dinamikën e dialogut si dhe të kërkojë një vëmendje më të madhe nga Shtetet e Bashkuara të Amerikës dhe Bashkimi Europian, meqë ata të gjitha kapacitetet e tyre i kanë drejtuar në Ukrainë dhe kështu rrezikon që Kosova dhe Ballkani të mbeten poshtë në axhendën e SHBA-së, BE-së dhe NATO-së.

Por kjo mund të prodhojë edhe një efekt tjetër, sepse në momentin që deklaron që ka një gjendje të jashtëzakonshme, një klimë lufte në Ballkan, atëherë normalisht që krijohet edhe një kaos nga brenda, siç kishim të bëjmë me çështjen e vajit, ngritjen e çmimeve të tjera e kështu me radhë.

Periskopi: A mendoni se fushata e Qeverisë Kurti për një anëtarësim të përshpejtuar në NATO do të jetë e suksesshme?

Shkodran Ramadani: Jo. Kjo nuk është asgjë më shumë se sa një entuziasëm i momentit. Ky është një proces që merr shumë vite. Anëtarësimi me procedura të përshpejtuar është shumë i vështirë sidomos për një vend si Kosova të cilin nuk e njohin disa shtete anëtare të NATO-së, e të cilat nuk do ta pranonin anëtarësimin e Kosovës aty pa e njohur Kosovën si shtet fillimisht, e për ta njohur duhet që Kosova ta përfundojë dialogun me Serbinë. Mirëpo dialogu nuk pritet të përfundojë edhe disa vite apo shumë shpejtë, prandaj NATO nuk do ta pres duarhapur Kosovën. Edhe anëtarësimi në BE, edhe në NATO dhe në organizatat e tjera ndërkombëtare parashihet të ndodhin pas përfundimit të dialogut Kosovë-Serbi.

Periskopi: Si e shihni të ardhmen e dialogut Kosovë-Serbi, tani nën rrethanat e reja ndërkombëtare?

Shkodran Ramadani: Nuk do të ketë një marrëveshje të shpejtë që e zgjidh çështjen e njohjes. Mund të ketë marrëveshje por jo të tillë që përfundon me njohje, dhe sa më e shpejtë që do të jetë ajo aq më jopërmbajtësore dhe aq më e vëshirë do të jetë të gjendet një formulë e cila e zgjidh kontestin mes Kosovës dhe Serbisë, e sidomos tani që duket se Kosovës po i konvenon përshpejtimi i dialogut por jo edhe Serbisë. Besoj që për shkak të influencës ruse që ajo ka, Serbia do t’i pres përfundimin e zhvillimeve në Ukrainë sepse nëse e fiton luftën Rusia atëherë do të fuqizohet pozicioni i Serbisë në dialog e nëse e humbë atëherë ai do të dobësohet. Kështu që nuk është në interes të Serbisë që të ngutet në këtë proces por mbetet të shihet se si do shkojë tutje.

Intervistoi: Qendrim Badalli