U rrit çmimi: ZRRE-ja vendos kundërligjshëm tarifat e reja të rrymës

ZRRE ka “kontrabanduar” tarifat e reja të energjisë elektrike për një vit duke shfrytëzuar procesin e rishikimit të jashtëzakonshëm të tarifave që u bë sot, si pasojë e krizës energjetike në të cilin po kalon vendi.

Periskopi ditë më parë kishte raportuar sesi ZRRE po planifikonte të veprojë dhe të shfrytëzojë këtë situatë duke favorizuar kërkesat e operatorit të energjisë KESCO, në dëm të konsumatorëve.

Skandal: ZRRE-ja tenton të kontrabandojë tarifat vjetore në rishqyrtim të jashtëzakonshëm

Vendosja e tarifave të reja me rritje të çmimit të energjisë elektrike deri në vitin 2023 gjatë rishikimit të jashtëzakonshme, bie ndesh me Rregulloren 15/2017, Për vendosjen e të hyrave për furnizim me shërbim universal (Rregulla për të hyrat në FSHU).

“Shqyrtimi i jashtëzakonshëm i tarifave duhet të jetë në përputhje me kërkesat e Rregullës nr. 15/2017, Për vendosjen e të hyrave për furnizim me shërbim universal (Rregulla për të hyrat në FSHU), neni 11, pika 2: “Gjatë shqyrtimeve të jashtëzakonshme do të llogaritet ndikimi i ngjarjes së jashtëzakonshme në të hyrat e rregulluara të shërbimit universal për pjesën e mbetur të periudhës rregullative. Nëse ndikimi është me i lartë se pragu u materialitetit, atëherë do të behet përshtatja në të hyrat e rregulluara të shërbimit universal. Pragu i materialitetit do të jete 5% e të hyrave, përveç nëse përcaktohet ndryshe në marrëveshje të përbashkët në mes të FSHU-së dhe Rregullatorit”, thuhet në Rregulloren e ZRRE-së.

Në anën tjetër, Periskopi pati pyetur ZRRE-në, se “a ka të drejtë ZRRE të vendos tarifa vjetore gjatë shqyrtimit të jashtëzakonshëm të tarifave sepse sipas legjislacionit në fuqi, vendosja e tarifave vjetore bëhet gjatë shqyrtimit të rregullt të tarifave?”, mirëpo nga ky institucion nuk ishin përgjigjur konkretisht në pyetjen tonë.

“Zyra e Rregullatorit për Energji është autoriteti i vetëm në vend që vendos për tarifa të Energjisë. Miratimi i tarifave është i përshkruar në nenin 48 të Ligjit për Rregullatorin e Energjisë (Ligji Nr. 05/L-084)”, thuhet në ‘përgjigjen’ e ZRRE-së dhënë Periskopit.

Sipas Rregullës 15/2017, Për të hyrat e FSHU-së, neni 2, paragrafi 1.3, Përshtatja Vjetore, nënkupton përshtatjen e të hyrave të lejuara dhe tarifës së rregulluar me pakicë, të realizuar në fund të çdo viti relevant, që nënkupton periudhën 12 mujore mes të përshtatjeve vjetore dhe kjo në asnjë rast nuk përcakton se me shqyrtimin e jashtëzakonshëm mund të përcaktohen tarifa vjetore.

Nuk dihet nëse do të merren masa ndaj ZRRE-së për shkeljen e rregullores e cila përcakton rishqyrtimin e tarifave, por dihet se qytetarët do të paguajnë për një vit të tërë me këto tarifa, pavarësisht çmimit të energjisë në treg.

Ndërkohë, sipas vendimit të sotëm të ZRRE-së, tarifa e ulët për konsumatorët që shpenzojnë nën 800 kilovat është 2.89 centë (pa TVSh) në tarifën e ulët apo atë të natës kurse 6.75 centë (pa TVSh) në atë të lartën apo të ditës.

Ndërsa për kilovatët e shpenzuar mbi bllokun prej 800 kilovat, tarifën e lartë apo atë të ditës konsumatorët do ta paguajnë me 12.5 centë ndërsa tarifën e ulët apo atë të natës do ta paguajnë me 5.9 centë.

Po ashtu, bordi i ZRRE-së ka vendosur që blloqet do të vlejnë vetëm për konsumatorët shtëpiakë ndërsa për ata komercialë (bizneset) nuk do të ketë./Periskopi/

Na ndihmon ZRrE-ja: Mbi 800 kilovatë, vjen fatura me shtrenjtim