Tensionet me Ukrainën, Rusia paralajmëron dështim të bisedimeve nëse BE’ja bën një veprim

Ministri i Punëve të Jashtme i Rusisë, Sergei Lavrov, tha të enjten se përgjigjja e përbashkët e Bashkimit Evropian ndaj propozimeve ruse të sigurisë do të çonte në dështim të bisedimeve, por këmbënguli se Moska është në favor të diplomacisë për t’i ulur tensionet për Ukrainën.

Duke folur pas takimit me homologen britanike, Liz Truss, kryediplomati rus tha se nuk mund ta kuptojë ankthin e Britanisë për ushtrimet ushtarake ruse në Bjellorusinë fqinje, faza aktive e të cilave filloi të enjten, shkruan Reuters.

Rusia besohet se ka mbi 100.000 trupa afër kufirit të Ukrainës dhe këto ditë, ushtria ruse do të zhvillojë edhe ushtrime të përbashkëta ushtarake me forcat bjelloruse në Bjellorusi.

NATO-ja, Shtetet e Bashkuara dhe vendet evropiane e kanë paralajmëruar Rusinë se do të përballet me sanksione të ashpra, nëse e pushton Ukrainën. Në anën tjetër, Rusia ka paraqitur kërkesa për garanci të sigurisë, përfshirë kërkesën për mosanëtarësimin e Ukrainës në NATO.

Pavarësisht tensioneve dhe gjuhës së ashpër, figura të larta perëndimore po bëjnë përpjekje që përmes diplomacisë me Rusinë t’i ulin tensionet rreth mosmarrëveshjeve për Ukrainën dhe NATO-n. Presidenti i Francës së fundi shkoi në Moskë në përpjekje për të siguruar zotim nga Rusia se nuk do ta tensionojë edhe më shumë situatën.