Presidentja në 14 vjetorin e pavarësisë: Dënojmë tendencën e pushtimit të Ukrainës nga Rusia

Presidentja e Kosovës, znj.Vjosa Osmani, në fjalimin e saj në nder të 14 vjetorit të pavarësisë së shtetit të Republikës tonë, ka kujtuar Ibrahim Rugovën, Adem Jasharin, luftën e UÇK-së, dëshmorët, viktimat e luftës në Kosovë.

“Në këtë sallë 14 vjet më parë, Kosova u shpall shtet duke u jetësuar kështu vullneti i qytetarëve për të jetuar në një shtet të pavarur e sovran. Ishte rezistenca e popullit tonë që trasoi hapat për qëndresën tonë për liri e shtet.  Nën udhëheqjen e atit tanë themeltor doktor Ibrahim Rugova, Kosova i bëri të ditur botës demokratike se synim i saj ishte pavarësia e vendit si një parakusht për paqe e stabilitet në rajon. Çlirimi nga robëria nuk ishte drama jonë kombëtare me një akt. Për aq sa u rrit shtypja ndaj nesh, u rrit rezistenca jonë paësore në rezistencë të armatosur.  Secila luftë i ka heronjtë e vet, liria jonë i njeh komandantin legjendar Adem Jashari bashkë me familjen e tij si udhëheqës të kësaj lufte”, tha Osmani, përcjell Periskopi.

Më pas, Presidentja ka folur për situatën në Ukrainë.

“Liria kërkon mirëmbajtje, gjithmonë ka forca destruktive që e cënojnë atë.

Sot Kosova rajoni dhe gjithë globi po përballet me rreziqe nga kursi agresiv i Rusisë.

Tendenca destabilizuese e saj nëpërmjet aletatit të saj, Serbisë, synojnë të shkaktojnë destabilizim edhe në rajonin e Ballkanin.

Përpjekjet e tilla i dënojmë fuqishëm sic e dënojmë edhe kërcënimin e hapur dhe tendencën për pushtimin e Ukrainës nga Rusia.

Kjo pëprjekje nuk është vetëm një luftë ndëmrjet dy shteteve por edhe përpjekje për krijimin e një rendi të ri botëror.

Është konflikt i ashpër mes demokracisë dhe lirisë së popujve në njërën anë,  kundër autokracisë në anën tjetër”, tha Osmani./Periskopi/