Paret e udhës: Paralajmërimi i deputetit të VV-së për kolegët që mashtruan me vendbanimin

Adnan Rrustemi i Vetëvendosjes, ka folur lidhur me kompensimin e shpenzimeve të rrugës dhe çështjen që dyshohet se deputetë të caktuar, mashtruan me vendbanimin e tyre.

“Ne jemi të bindur që ky kompensim ishte i panevojshëm, i tepërt për deputetët. Duhet të dallojmë rastet individuale që kanë dhënë adresën e pasaktë. Nuk kompensohen shpenzimet e derivateve, nuk paraqiten as kilometra e as distanca. Rastet individuale që mund të ekzistojnë, që nuk jam i informuar për raste individuale, por jemi për rregullim që deputetët të mos kenë kompensim për udhëtim”, ka thënë Rrustemi.

“Konsiderojmë që një vendim i tillë nuk do të duhej të merrej që më 2011. Nëse sot duket vendim i panevojshëm imagjinojeni çfarë ka qenë në vitin 2011.

Edhe për shkak të krijimit të opinionit publik sa i përket pagave dhe kompensimeve, ne do të kërkojmë formalisht që Kuvendi të rishikojë kompensimet pra vendimin e vitit 2011.

Duhet një vendim duke marrë parasysh edhe gjendjen në Kosovë.

Ndjeshmëria e ngritur në opinion publik, e përshpejton këtë proces, nuk do të thotë se jemi vonë në këtë aspekt”, ka thënë ai./Periskopi/