Osmani analizon situatën në Ukrainë: Jemi të shqetësuar, edhe Serbia është e koordinuar me Rusinë

Osmani ka thënë se, ashtu si shumë vende demokratike, edhe Kosova është e shqetësuar me ngjarjet dhe një konflikt të mundshëm ushtarak mes Rusisë dhe Ukrainës, ndërsa shtoi se Kosova mbështet sovranitetin dhe integritetin territorial të Ukrainës.

“Natyrisht ashtu si pjesa tjetër e botë demokratike, ne jemi thellësisht të shqetësuar për ngjarjet që po zhvillohen në Ukrainë. Së pari dëshiroj të shpesh mbështetjen dhe solidaritetin tonë me popullin e Ukrianës, si dhe mbështetjen e plotë për sovranitetin dhe integritetin territorial të këtij vendi”, ka thënë Osmani.

E para e vendit, ka shprehur edhe shqetësime se si një konflikt i mundshëm atje, mund të ndikojë edhe në Kosovë, pasi siç ka thënë, Serbia është në koordinim të plotë me Rusinë.

“Serbia është plotësisht e mbështetur dhe e koordinuar me aleatin e saj, Rusinë. Ne jemi të shqetësuar për bashkërendimin e tyre të mundshëm si rezultat i ngjarjeve në Ukrainë. Prandaj, mënyra se si do të zhvillohen ngjarjet në Ukrainë, vërtet mund të ketë një efekt përhapës në shumë pjesë tjera të botës”, tha Osmani për “Times Radio”

Më tej, ajo shtoi se Serbia po sfidon stabilitetin e Kosovës dhe disa shteteve tjera me ndihmën e Rusisë, ndërsa kërkoi që NATO të ketë rol më aktiv si përgjigje ndaj këtyre sfidave.

“Nuk është rastësi që ne po shohim sfida për stabilitetin në Bosnjë dhe Hercegovinë, Mal të Zi dhe Kosovë nga qasja agresive dhe përpjekje destabilizuese të Serbisë të ndihmuara nga Rusia. Mendoj se përgjija duhet të jetë e unifikuar, ndaj NATO-ja duhet të ketë një rol shumë aktiv”, shtoi presidentja e vendit