Kancelari austriak ua lehtëson krizën me rrymë popullit: Lëshojini nxemjet, ne ju ndihmojmë me para

Për dallim nga kryeministri i Kosovës, Albin Kurti, shefi i qeverisë austriake nuk e konsideron ngrohjen me batanije si opsion.

E për shkak se çmimi i rrymës për dikë mund të jetë i lartë në Austri, kancelari atje ka thënë se do të ndihmohen ata që kanë nevojë për ndihmë.

“Askush në Austri nuk duhet të shqetësohet se nuk mund ta ndezë ngrohjen sepse çmimet e energjisë janë shumë të larta. Ne ndihmojmë ata që kanë nevojë për ndihmën tonë”, është shprehur kancelari Nehammer.

Andaj, sipas njoftimi të bërë, me nga 150 euro do të ndihmohen rastet sociale dhe të papunët, pastaj do të pezullohet tarifa fikse e energjisë elektrike dhe do t’u jepen nga 300 euro shtesë për grupet e pambrojtura.

“150€ ndihmë për rastet sociale dhe të papunët. Pezullimi i tarifës fikse të energjisë elektrike. 300€ shtesë për grupet e pambrojtura”, thuhet në njoftim.

Në dhjetorin e fundit, Kurti gjatë një konference për media njoftoi se vendi ndodhet në një krizë energjetike. Gjatë konferencës, kryeministri tha se mbrëmë është ngrohur me batanije.

“… e mbrëmë kur kam shkuar shumë vonë në shtëpi jam ngrohur me batanije…”, kishte deklaruar Kurti.

Vendimi i Qeverisë për t’u rritur çmimi i rrymës pas rekomandimeve të ZRRE-së ka hyrë në fuqi dje. Si rezultat, çmimi i rrymës në fund të muajit shkurt do të vijë me rritje.

Lidhur me këtë çështje janë organizuar edhe protesta. Ndërsa opozita ka dalë kategorikisht kundër këtij vendimi. PDK-ja ka thënë se do të ndjekë procedurat ligjore nëpër organet e drejtësisë kundër këtij vendimi.

Ndërsa sa i përket qytetarëve që jetojnë në veri të vendin, REL ka raportuar gjatë ditës se atje nuk shkojnë as faturat e as nuk nuk do t’ju rritet çmimi.