Hondurasi arreston ish-presidentin: Dyshohet për lidhje me trafikun e drogës

Policia e Hondurasit arrestoi ish-presidentin Juan Orlando Hernandez të martën me kërkesën e Shteteve të Bashkuara. Uashingtoni dyshon se zoti Hernandez është përfshirë në trafikun e paligjshëm të drogës.

Zoti Hernandez, i cili la detyrën tre javë më parë, u shoqërua nga shtëpia e tij në Tegucigalpa i lidhur me pranga dhe me një xhaketë antiplumb në trup.

Gjykata e Lartë zgjodhi një gjyqtar për të trajtuar çështjen dhe ai nënshkroi një urdhër për arrestimin e ish-presidentit. Policia, e cila kishte rrethuar shtëpinë e zotit Hernandez që nga e hëna, e mori atë në paraburgim.

Zoti Hernandez u implikua vazhdimisht si bashkëpunëtor në gjyqin e vëllait të tij për trafikun e drogës në vitin 2019 nga prokurorët e Nju Jorkut. Vëllai, Juan Antonio Hernández, u shpall fajtor për akuzat për trafik droge dhe armësh dhe u dënua me burgim të përjetshëm.

Sekretari amerikan i Shtetit, Antony Blinken tha në fillim të këtij muaji se kishte raporte të besueshme se zoti Hernandez ;është përfshirë në korrupsion të konsiderueshëm duke kryer ose lehtësuar akte korrupsioni dhe narkotrafiku dhe duke përdorur të ardhurat për të financuar karrierën e tij politike.

Zoti Hernandez u betua si përfaqësues i Hondurasit në Parlamentin e Amerikës Qendrore më 27 janar, vetëm disa orë pasi pasardhësja e tij, Xiomara Castro, u bë presidentja e parë grua e vendit. Avokati i tij thotë se ai ka imunitet nga ekstradimi sepse është deputet i parlamentit rajonal.

Ministria e Punëve të Jashtme të Hondurasit njoftoi të hënën në Tëitter se Ambasada amerikane në Tegucigalpa kishte kërkuar zyrtarisht arrestimin e një politikani të Hondurasit, për ekstradim të mundshëm në Shtetet e Bashkuara. Ish presidenti Hernandez u identifikua si politikani i kërkuar për ekstradim, pasi rrjeti televiziv CNN transmetoi pamje të kërkesës.

*Artikulli përmban të dhëna të marra nga agjensitë e lajmeve Associated Press, Reuters dhe AFP