Tenderi i insulinave: OSHP kërkoi masa ndaj Berat Marmullakut por KRPP e ndëshkon Ismet Hysenin

Procedura për masa nisi ndaj zyrtarit të prokurimit Berat Marmullaku, por përfundoi me pasoja për shefin e tij Ismet Hyseni, shkruan Gazeta Shneta.

Hysenit i është anuluar certifikata e prokurimit nga Bordi i KRPP-së pas një ankese nga Organi i Shqyrtimit të Prokurimit Publik, ndërsa Berat Marmullakut iu dha një vërejtje ndonëse ankesa ishte kundër tij.

Këto masa ndaj tyre nga KRPP janë marr pas ankesës së OSHP-së në kuadër të shqyrtimit të ankesës së kompanisë “Pharma Leader” për tenderin e insulinave në MSH.

“Sipas gjendjes faktike dhe të gjeturave të lartë cekura të cilat në çdo rrethanë përcaktojnë se z. Ismet Hyseni ka vepruar në kundërshtim me Ligjin e Prokurimit, fillimisht duke bërë dy zgjedhje kontradiktore ku për të njëjtin aktivitet prokurimi, për të njëjtin produkt, me të njëjtat kritere në Dosje të Tenderit, në fillim OE ‘Pharma Leader’ e rekomandon për kontratë për lot 1 dhe lot III, kurse më pas duke u bazuar në raportin e rivlerësimit të datës 04.03.2021 për të njëjtin aktivitet prokurimi, për të njëjtin produkt me të njëjtat kritere në Dosje të Tenderit dhe me çmimin më të shtrenjtë OE ‘Meditech’ e rekomandon edhe për lot I dhe lot III. Duke mos e respektuar Vendimin e OSHP-së dhe duke anuluar aktivitetin e prokurimit në kundërshtim me nenin 62 të LPP-së i ka vazhduar shkeljet ligjore të cilat me Rregullat dhe Procedurat e Dhënies dhe Revokimit të Certifikatës Profesionale për Prokurim Publik konsiderohen si shkelje të rënda. Si rrjedhojë e kësaj, komisioni konsideron se ka bazë të qëndrueshme ligjore që të rekomandoj për anulimin e certifikatës së prokurimit për z. Ismet Hysenin në pajtim me Rregulloren 02/2017”, thuhet në vendimin e Bordit të KRPP-së.

Pas këtij vendimi Hyseni do të mund të ushtrojë funksionin e një zyrtari të thjesht të prokurimit, por s’mund të marr vendime për tenderët.

Ndërkaq me rekomandim të Komisionit, ndaj Marmullakut është shqiptuar vërejtje me shkrim.

“Duke u bazuar në kronologjinë e këtij Raporti, të gjeturat e komisionit lidhur me këtë aktivitet dhe në Vendimin për anulimin e aktivitetit të prokurimit në kundërshtim me nenin 62 të LPP-së të datës 12.08.2022 të proceduar nga z.Ismet Hyseni e të cilin z.Marmullaku në cilësinë e ZPP e ka lënë në fuqi duke mos përmirësuar shkeljet ligjore që janë bërë me këtë vendim, Komisioni i rekomandon Bordit që t’i shqiptohet masa Vërejtje me shkrim”, thuhet në vendimin e KRPP-së.

Në vendimin të cilin e posedon Gazeta, komisioni i KRPP-së gjatë shqyrtimit të rastit kanë shprehur paqartësi në lidhje me përgjegjësinë e Hysenit dhe Marmullakut. Kjo për faktin se Hyseni kishte marr pushim mjekësor menjëherë pas marrjes së vnedimit për anulimin e tenderit të insulinave më datë 12.08.2022.

“Këtë gjë ai e dëshmon edhe me korrespodencat dhe njoftimet të cilat i ka pranuar nga Sekretari i Përgjithshëm i MSH-së”, thuhet në dokumentin e vendimit të KRPP-së të cilin e posedon Gazeta Shneta.

Madje ky komision kishte kërkuar nga OSHP që t’ia sqaronte nëse procedura të vazhdonte ndaj Marmullakut apo ndaj Hysenit.

“OSHP ka kthyer një përgjigje duke i dërguar disa dëshmi e që shumica përfshinin korrespodenca të z.Marmullakut me Bordin e OSHP-së dhe ekspertin e caktuar për shqyrtimin e ankesave. Për komisionin, OSHP nuk ka sqaruar se si të vazhdojmë ta trajtojmë kërkesën e tyre (të vazhdojmë me emrin e z.Berat Marmullakut apo ta trajtojmë me emrin e z.Ismet Hysenit)”, thuhet në këtë dokument.

Ndërkaq në një paragraf më poshtë thuhet se Komisioni ka gjetur se Hyseni si Zyrtar Përgjegjës i Prokurimit në MSH, ishte përgjegjës për ndërmarrjen e të gjitha veprimeve për këtë aktivitet deri më datën 17.08.2022, ndërsa pas kësaj date ishte caktuar në këtë pozitë Marmullaku. Sipas Komisionit, Hyseni nuk kishte kthyer asnjë përgjigje për këtë çështje.