SPAK distancohet nga qëndrimi i Hykollit: Mbështetja e dhënë për Ligjin për pagat qëndrim personal, jo i BSPK-së

Sipas një reagimi për media nga SPAK, thuhet se këtë qëndrim SPAK-u e konsideron si personal të tij dhe assesi qëndrim i BSPK-së.

“Pas raportimit nga mediat për takimin e kryeministri të Kosovës, Kurti me kryetarin e BSPK-së, Hykolli dhe mbështetjes së dhënë nga ky i fundit kryeministrit për miratimin e dy ligjeve, atij për Zyrtarë Publikë dhe Ligjit të Pagave, SPAK -u është i shokuar dhe distancohet fuqishëm nga ky qëndrim i Hykollit duke e konsideruar dhe konstatuar se ky qëndrim është puro personal i tij dhe assesi qëndrim i BSPK-së e as qëndrim i kryesisë se BSPK-së, pasi që kryesia nuk është ftuar të diskutoj për këtë temë”, thuhet në reagim.

Po ashtu sipas reagimit bëhet e ditur se këto dy ligje, me theks të veçantë ai i zyrtarëve publikë nuk e kanë kundërshtuar vetëm sindikatat por i njëjti është kundërshtuar edhe nga sektori publik si dhe organizatat ndërkombëtare.

“Sa për dijeninë tuaj këto dy ligje e me theks të veçantë atë të zyrtarëve publik nuk e kanë kundërshtuar vetëm sindikatat, por të njëjtit u kundërshtuan ashpër edhe nga sektori i drejtësisë, organizatat ndërkombëtare që e suportojnë Republikën e Kosovës në fushën e legjislacionit por gjatë ditës edhe vet misioni i BE-së”, thuhet në reagim.

Ndryshe, kryeministri i Kosovës, Albin Kurti, priti të premten në takim kryetarin e Bashkimit të Sindikatave të Pavarura të Kosovës (BSPK), Atdhe Hykolli, i cili sipas njoftimit të Qeverisë kishte thënë se BSPK mirëpriti votimin e Ligjit për Zyrtarët Publikë dhe atë për Pagat në Sektorin Publik, ndërsa u vlerësua edhe ndikimi pozitiv i Pakos për përballje me inflacionin.