Kur Pacolli tregonte se si ‘guximtarët’ e Pecit e lusnin që të kthehej nga Stambolli për ta votuar Vjosa Osmanin Presidente

Kryetari i AKR-së Behgjet Pacolli në kohën kur ishte votuar Vjosa Osmani si Presidente kishte thënë se është kthyer nga Stambolli me avion privat për të votuar Osmanin si presidente.

“Unë jam deputet i Kuvendit të Kosovës, kam edhe një parti e cila ka bile edhe disa asamblistë nëpër komuna që tani i ka votuar. Konsideroj se kam një respekt nga njerëzit ku shkoj. Askënd s’e kam gënjyer, askënd s’kam mashtruar, s’e kam zhvatur buxhetin, s’kam marrë as pagë, s’di çka është me marrë pagë për Kosovën”, ishte shprehur Pacolli.

Pacolli kishte treguar si e kishin ftuar për të ardhur e për të votuar Osmanin.

“Unë kam qenë në Stamboll. Fëmijët e mi erdhën prej Zvicrës, unë i prita në Stamboll. I kam futur në aeroplanin tim duke u mbyll dera, se ne shkonim në pushim me fëmijët e mi. Vjen një telefonatë prej Prishtinës: “Ju lutem kthehuni se sot do të ketë votim për presidenten”. Unë u dashtë me ju thanë fëmijëve të mi që e kishin prit pushimin: “shkoni ju e unë vijë nesër”, deklaronte ai për RTK-në.

“Unë e kam marrë një aeroplan tjetër privat, e kam paguar 90 mijë euro prej Stambollit, kam ardhur në Prishtinë e kam votua zonjën Osmani dhe jam kthyer prapë në Stamboll, e kam marrë avionin tjetër dhe kam shkuar te fëmijët e mi”, ka thënë ai.

Madje Pacolli thoshte se asnjëherë nuk është falënderuar për këtë veprim.

“Asnjëherë, as Vjosa Osmani s’më ka thirr. Tre mesazhe ia kam dërguar Vjosa Osmanit’, kishte thënë ai.