Fillon të gërryhet asfalti tre ditë pas asfaltimit të rrugës te Pallati Drejtësisë

Kryetari i Prishtinës, Përparim Rama ka qenë ai i cili ka dhënë lajmin e mirë se rruga “Nekibe Kelmendi”, pas katër muajve mbyllje po bëhet e kalueshme për automjete.

“Po asfaltohet edhe rruga “Nekibe Kelmendi”, një ndër më të rëndësishmet për zhvillimin e Prishtinës së Re”, shkroi të martën kryetari Rama, duke e ilustruar këtë njoftim më disa fotografi.

Periskopi ka parë se rruga e re ka nisur të jap sinjale se kualiteti i punimeve mund të mos ketë qenë sipas standardeve. Në disa pjesë të saj, këtë të premte janë vërejtur disa gërryerje mbi asfalt, që pas disa ditëve shihet që mund të dalin edhe gropat.

Për këtë projekt është kontraktuar “Gërlica -Company”, por siç shihet nga fotografitë e publikuara nga komuna, asfalti është shtruar nga kompania “Rahovica”.

Mësohet se menaxher i kontratës është Irfete Zejneli.

Periskopi ka kontaktuar më zonjën Zejneli. Ajo ka thënë se asfalti nuk është shtruar akoma mbi këtë rrugë.

“Rruga do të asfaltohet vitin tjetër. Njëherë është shtruar vetëm bitozhavori. Por për më shumë informata mund të merrni në zyrën për informim të Komunës”, ka thënë ajo shkurt.

Periskopi ka pyetur disa inxhinier të rrugëve dhe ata kanë thënë se kjo shtresë që është shtruar nga komuna, është asfalt. Bëhet fjalë për shtresën e parë të asfaltit që quhet BZH 32 dhe që është në një trashësi prej 9 centimetra. Shtresa e dytë për të cilën ka folur menaxherja është në një trashësi prej 4 cm dhe është asfalt 0/11.

Pos që kualiteti mund të jetë i cilësisë më të ulët, komuna ka punuar në temperatura të pafavorshme për ndërtim të rrugëve.

Të martën, temperatura maksimale ka qenë 6 °C dhe minimalja – 4 °C.

Sipas standardeve të Bashkimit Evropianë nuk është e preferuare që asfalti të shtrohet nën temperaturën 10 °C. Në BE, më poshtë e ka vetëm Kroacia, ku lejohet asfaltimi deri në minimumi 6 °C.

Komuna e Prishtinës kishte rekomanduar për kontratë një kompani me ofertë mbi 26 mijë euro më shumë se sa vlera të cilën e kishte parashikuar për ndërtimin e rrugës “Nekibe Kelmendi”.

Vlera e parashikuar e kontratës ka qenë 500 mijë euro. Ndërsa, për tender është rekomanduar kompania  “Gërlica” Sh.p.k, me ofertën prej 526 mijë e 736 e 83 euro. Të gjithë operatorët ekonomikë kanë ofertuar me çmime mbi vlerën e parashikuar prej 500 mijë eurove. Më e lira ka qenë kompania e rekomanduar, “Gërlica”. /Periskopi/