“Barrikadat edhe disa ditë”, VV me një video që ia lë meritat Kurtit

Pavarësisht fjalëve, institucionet e sigurisë së Republikës së Kosovës nuk kishin mundur të marrin kurrfarë veprimi për heqjen e barrikadave, meqë s’mund të veprohej pa leje të komandantit të KFOR-it në Kosovë me të cilin Kurti zhvilloi disa takime.

Megjithatë Beogradi dhe serbët u bindën për heqje të barrikadave vetëm pas një seri veprimesh të ndërlidhura mes vete. Veprimi i parë që kanë marrë institucionet e Republikës së Kosovës ka qenë ndryshimi i masës së sigurisë për Dejan Pantiq. Pantiq nga paraburgimi është lëshuar në arrest shtëpiak. Prokuroria Speciale ka thënë se për shkak të gjendjes shëndetësore dhe pamundësisë së dërgimit të tij në paraburgim si gjithë të tjerët kanë kërkuar që ai të lirohet në arrest shtëpiak.

Përveç Pantiq është liruar edhe Nikolla Nedeljkoviqi që ishte arrestuar gjatë Vidovdanit.

Gjithashtu është publikuar edhe një komunikatë e përbashkët e Bashkimit Evropian dhe Shteteve të Bashkuara të Amerikës në të cilën komunikatë tregohet se Kosova ka dhënë garancitë e saj që s’ka listë për arrestimin e njerëzve në barrikada.

Krahas këtyre dy zhvillimeve, edhe misioni paqeruajtës i KFOR-it ka lëshuar një deklaratë në të cilën ka sqaruar se Serbia duhet ta njoftojë KFOR-in në rast se dëshiron të afrohet në më pak se 1 kilometër afër kufirit të Kosovës, ndërkohë kishte sqaruar se Forca e Sigurisë së Kosovës nuk mund të vendoset në veri të vendit pa miratimin paraprak të komandantit të KFOR-it.

Menjëherë pas këtyre zhvillimeve, Goran Rakiq ka zhvilluar një bisedë me presidentin e Serbisë i cili i kishte thënë se është mirë që barrikadat të largohen meqë janë dhënë një varg garancish nga Perëndimi.

Megjithatë në opinion dhe në rrjetet sociale u tha se gjithçka u bë me marrëveshje mes Kurtit e Vuçiq.

Ndërkohë sot Lëvizja Vetëvendosje kanë publikuar një pjesë nga intervista e kryeministrit të Kosovës, Albin Kurti në të cilën kishte deklaruar se barrikadat s’mund të zgjasin me muaj, as me javë por disa ditë. Në faqen zyrtare të partisë që Kurti drejton është theksuar se këtë deklaratë Kurti e ka dhënë para katër ditësh.

“E thënë para 4 dite, nga Kryeministri Kurti:Kjo nuk mund të vazhdojë për javë të tëra. Jo vetëm që nuk mund të zgjasë me muaj, por nuk mund të zgjasë as me javë. Kjo mund të zgjasë disa ditë”, thuhet në përshkrimin e videos së publikuar në faqen e Lëvizjes Vetëvendosje.

Ndërkohë deklaratë se largimi i barrikadave është çështje orësh e ka thënë dje edhe presidentja e vendit, Vjosa Osmani, pas gjithë involvimit ndërkombëtar që bindi serbët dhe Vuçiqin për heqje të barrikadave.

Por institucionet e Kosovës s’kanë mundur ta marrin asnjë veprim për më shumë se dy javë. Policët e Kosovës kishin mbetur të ngujuar në veri të vendit me vështirësi për higjienë dhe ushqim. Ndërkohë në pikën kufitare në Jarinjë kishte mbetur edhe i arrestuari Dejan Pantiq meqë institucionet e sigurisë së Kosovës s’mund ta transportonin atë në qendër të paraburgimit.

Ishte kërkuar edhe ndihma e KFOR-it për ta bërë një gjë të tillë, megjithatë misioni i NATO-s kishte refuzuar ta bënte.