S’mund dhe s’duhet të lejohet: Tahiri reagon për uljen e pagave të gjyqtarëve e prokurorëve

Sipas shefit të Grupit Parlamentar të PDK-së, kjo ulje pagash nuk ka të bëjë as me buxhetin, as me kursimin, por, siç thotë ai, kjo është përpjekje e kryeministrit Kurti për të krijuar një krizë identitare ndaj këtyre zyrtarëve.

“Ulja e pagave të gjyqtarëve dhe prokurorëve, nuk ka të bëjë as me buxhetin, as me kursimin dhe as me ligjshmërinë. Ky vendim është përpjekje e paramenduar e Albin Kurtit, për të krijuar një krizë identitare ndaj atyre që punojnë për çdo ditë për rend dhe ligj”, ka shkruar Tahiri në Facebook.

Tahiri tha se ky vendim ka edhe një dimension kritik institucional e kushtetues, sepse përmes tij është hedhur baza për regres në besimin e paanshmërisë, përkushtimit dhe drejtësisë institucionale, si dhe janë cenuar parimet kushtetuese të pavarësisë së pushtetit të tretë.

“Përpjekja për ta subordinuar këtë pushtet përmes uljes së pagave dhe lojës me paga, në fakt është jo veç përpjekje. Është në radhë të parë përndjekje. Kjo s’mund dhe s’duhet të lejohet”, ka shtuar ai.

Tahiri tha se sot u përmbys përspektiva e organeve të drejtësisë që të punojnë si të pavarurar, të pandikuara dhe të zbatojnë ligjin siç përcaktohet në kushtetutë.

“Në së paku 10 vitet e fundit, institucionet e Kosovës kanë ndërtuar një perspektivë ku organet e drejtësisë punojnë të pavarura, të pandikuara, të paanshme, që zbatojnë ligjin dhe drejtësinë siç e përcakton kushtetuta dhe që për punën e tyre marrin kompensim adekuat e meritor. Sot, kjo perspektivë u përmbys, nga kryeministri që po përmbys çdo gjë të mirëfilltë, përballë mësymjes jo konvencionale me të cilën ai i është qasur qeverisjes”.

Sipas tij, në kohë inflacioni e stagnimi ekonomik, një qeveri e përgjegjshme do të duhej të rriste pagat e jo t’i ulte ato, madje jo vetëm për gjyqtarë e prokurorë por për të gjithë sektorin publik.