Skënder Hyseni mesazhe Gërvallës dhe LDK-së: Jetojmë në demokraci, fjalën e lirë s’mund ta ndalni

Deklarata e ish-ministrit të jashtëm, Skënder Hyseni, se ‘edhe Millosheviqi e quante krejt botën armiq”, duke krahasuar reagimet e presidentes dhe kryeministrit ndaj miqve ndrkombëtarë, ka ngjallur reagime të shumta.

“Edhe Millosheviqi e quante krejt botën armiq të Serbisë atëherë kur bota neve na ndihmonte, edhe ata e quanin krejt botën, krejt bota janë armiq të Serbisë. Edhe Vjosa Osmani dje tha se krejt bota janë armiq të Kosovës dhe po ia mbajnë anën Serbisë. Po kjo nuk është e vërtetë fare”, ishte deklarata e Hysenit.

Nga një deklaratë e tillë, partia e Skënder Hysenit, Lidhja Demokratike e Kosovës u distancua, duke e quajtur një ‘fjalor kontaminues për sferën publike’.

“Unë komentoj zhvillimet politike. Nuk komentoj reagime të askujt çfarëdo qofshin ato. Jetojmë në një botë besoj unë demokratike ku fjala e lirë është e shenjtë. Ndërkaq reagimet e tyne le ti komentojnë ata që i kanë bërë ato reagime. Fjala ime dhe mendimet e pikëpamjet e mia politike janë publike. Nuk ia imponoj askujt le ta vlerësoj kush si të dojë. Po fjalën time të lirë nuk mund të ma ndaloj askush. Nuk komentoj pyetni ata që kanë reaguar”, tha Hyseni në një prononcim për Periskopin.

Ndër reagimet e ashpra ndaj Hysenit, ishte edhe ai i ministres së jashtme Donika Gërvalla, e cila veç tjerash tha “Zoti të marroftë’ duke iu referuar vetë Hysenit./Periskopi/Besrta Hoti/