Shtyrja për 48 orë, nga BE flasin për Periskopin: Do ta shfrytëzojmë këtë kohë për të gjetur zgjidhje

Periskopi ka kontaktuar me zëdhënësin e Bashkimit Evropian për Punët e Jashtme dhe Politikën e Sigurisë, Peter Stano, për të komentuar këtë vendim të Kurtit.

Stano për Periskopin ka folur edhe për takimin e djeshëm Kurti-Vuçiq në Bruksel, derisa ka thënë se BE i ka paraqitur dy propozime të balancuara kompromisi që do të kishin de-përshkallëzuar situatën aktuale, për të cilat nuk pati pajtime.

“Borrell dhe Lajçak, pritën kryeministrin Kurti dhe presidentin Vuçiç më 21 nëntor për një takim urgjent për të zbutur përshkallëzimin e afërt në veri të Kosovës për një mosmarrëveshje mbi targat. Gjatë takimit, lehtësuesi i BE-së paraqiti dy propozime të balancuara kompromisi që do të kishin de-përshkallëzuar situatën aktuale. Fatkeqësisht, ende nuk është arritur marrëveshje për shkak të mosmarrëveshjeve ndërmjet palëve. Borrell u bëri thirrje palëve që të përmbahen nga çdo masë që mund të përshkallëzonte situatën në terren dhe kujtoi se ai priste që palët të angazhoheshin në mënyrë konstruktive për të arritur një marrëveshje”, ka deklaruar Peter Stano.

Ai tutje shtoi se BE do ta shfrytëzojë këtë periudhë për të vazhduar bisedimet me të dyja palët me synimin për të gjetur një zgjidhje.

“Kosova është pajtuar që të shtyjë vendosjen e gjobave për 48 orë. Ne do ta shfrytëzojmë këtë periudhë për të vazhduar bisedimet me të dyja palët me synimin për të gjetur një zgjidhje. Nëse anëtarësimi në BE është objektivi përfundimtar i Kosovës dhe Serbisë, për të cilin janë zotuar të dyja, ne presim që edhe ata të veprojnë në përputhje me rrethanat”, ka thënë Stano.

Kujtojmë që dje në Bruksel, në takimin Kurti-Borrell-Vuçiq nuk pati asnjë marrëveshje për targat, ndërsa sot Kurti tha se nuk ka folur me Borrellin mirëpo shtoi se SHBA është në kontakt me Brukselin. /Periskopi/