Presioni politikë rrezikon progresin e lirisë së mediave në Kosovë

Qeveria Kurti po vazhdon të kritikohet për presion ndaj gazetarëve më Kosovë, shkruan Periskopi.

Kështu po thotë një raport i publikuar nga Qendra Evropiane për Lirinë e Mediave.

“Përfaqësuesit e medias vunë në dukje si një shqetësim të veçantë se retorika përçarëse dhe fushatat shpifëse të drejtuara ndaj gazetarëve nga disa politikanë dhe zyrtarë publikë, përfshirë nga partia qeverisëse, po krijon një klimë në rritje armiqësie kundër medias.  Ata thanë se këto sulme verbale dhe përpjekje nga figurat politike për të përçarë komunitetin gazetaresk, ose për të portretizuar media të caktuara si aktorë politikë, mund të çojnë në kërcënime, ngacmime në internet dhe dhunë fizike” thuhet ndër të tjera në raport.

Tutje përmenden edhe sulmet ndaj gazetarëve, derisa gjyqësori kritikohet për mungesë të ndjekjeve penale.

“Pavarësisht progresit të rëndësishëm në këto fusha, siguria e gazetarëve dhe mosndëshkimi për krimet kundër gazetarëve vazhdojnë të paraqesin sfida për peizazhin e përgjithshëm të lirisë së medias.  Përderisa sulmet fizike mbeten të rralla, kërcënimet serioze janë dokumentuar vitin e fundit nga Asociacioni i Gazetarëve të Kosovës.  Procesi gjyqësor në çështjet penale dhe civile mbetet i ngadaltë dhe gazetarët shprehën shqetësimin për mungesën e ndjekjeve penale”, thuhet në raport.

Raportin e plotë e gjeni duke klikuar këtu: RAPORTI

Kujtojmë se Qeveria aktuale ishte kritikuar edhe në raport të DASH-it.

Raporti i publikuar  theksonte se gazetarët në Kosovë u kërcënuan për publikimin e artikujve që kritikonin punën e Qeverisë, partive politike apo zyrtarëve të veçantë.