Periskopi sjell rrëfimin nga Vitia rreth të miturës që mbeti shtatzënë: I dyshuari për dhunim e babai në burg

Ekipi i Periskopit, shkoi në fshatin Smirë të Vitisë për të biseduar me babain e vajzës për të kuptuar më shumë rreth kësaj ngjarje, por diçka e tillë ishte e pamundur pasi ai tashmë ka përfunduar në prangat e policisë.

Njëra anëtare e kësaj familjeje tha për Periskopin se edhe babai i vajzës edhe personi që po akuzohet për dhunim tashmë janë në burg. Ajo hezitoi të jepte informacione më shumë duke thënë se viktima 16 vjeçare është në gjendje të rëndë psikologjike dhe se ka disa muaj që ka lindur fëmijën.

“Babai i vajzës është në paraburgim bashkë me atë personin tjetër që është i përfshirë. Rasti është  zbuluar rastësisht. Vajza ka disa muaj që ka lindur fëmijën. Policia është duke e hetuar rastin. 16 vjeçarja është në gjendje të rëndë psikologjike.”, tha anëtarja e  kësaj familje, duke dashur të mos i zbulohet emri.

Lidhur me rastin, Periskopi ka kontaktuar  Policinë Rajonale të Gjilanit. Zëdhënësi Ismet Hashani na tha se s’mund të lëshohet në detaje, përpos që ta konfirmojë atë.

“Vetëm mundem me e konfirmu rastin por detaje tjera s’mundem me dhanë pasi që bëhet fjalë për të mitur, për këtë rast duhesh me thirr në prokurorinë për të mitur, se ne s’kemi ma tepër kompetenca me fol për rastin pasi që veç ka kaluar në prokurori”, tha ai.

Periskopi natyrisht ka dërguar pyetje edhe në Prokurorinë e Gjilanit për të kuptuar më shumë rreth këtij rasti, por që deri më tani nuk kemi marrë ndonjë përgjigje.