Kërkohet punësime aty ku mungon stafi shëndetësorë

Qeveria e Kosovës ka  ndarë buxhet për  punësimin e profesionistëve të rinj shëndetësorë.  Për kujdesin parësor shëndetësor janë aprovuar 300 pozita të reja, ndërsa për kujdesin dytësor dhe tretësor  janë aprovuar 100 pozita për kategoritë me prioritet.

Profesori i Fakultetit të  Mjekësisë, Ilir Tolaj, nuk duket shumë optimist për këto punësime. Ai shpreson që këto të mos bëhen për përfitime politike.

“Nga praktika e viteve të kaluara, çdo qeveri që vjen e shfrytëzon  punësimin e pakontrolluar të punëtorëve të rinj shëndetësorë në sektor të llojllojshëm varësisht prej interesave te tyre për të fituar poenë politikë. Nëse ky punësim e ka këtë qëllim, atëherë nuk do të arrihet asnjë efekt  pozitiv në kuptim të përmirësimit të kualitetit të shërbimeve shëndetësore”, tha Tolaj.

Diana Metushi, nga Instituti Demokratik i Kosovës, problemin nuk e sheh vetëm te krijimi i vendeve të punës në sektorin e shëndetësisë. Ajo thotë se është shumë i rëndësishme edhe  krijimi i kushteve  të punës për mjekët.

“Për kënd do të hapën ato 400 vende pune kur neve po na ikin mjekët prej vendeve të punës ekzistuese. Në vazhdimësi ndahen fonde, premtohen vende pune e që është në rregull, sepse Kosova ka nevojë. Megjithatë problemi është t’i mbajmë njëherë mjekët që i kemi, të krijojmë kushte të mira punë për ta e pastaj të hapim vende të reja të punës”, deklaroi Metushi.

Ndërsa nga Federata e Mjekëve të Kosovës, Tevide Imeri, thotë se në mjekësinë primare kërkesat për punësim janë shumë më të mëdha, e sidomos për infermier. Por kërkesa të menjëhershme për punësime ka edhe për anesteziologji, kardiokirurgjia e fëmijëve, kirurgjia pediatrie, shërbimet për nënën dhe fëmijën, shërbimet për sëmundje malinje etj. /rtk