Hetimet nga prokuroria drejt tij, Tahiri: Nuk e kërcënova Besnik Bislimin, më pengon sa herë flas

Zëvendëskryeministri i Kosovës, Besnik Bislimi, tha sot se është kërcënuar nga Abelard Tahiri gjatë seancës parlamentare që po mbahet të enjten.

Në seancën e sotme të Kuvendit të Kosovës ndodhi një përplasje verbale. Deputeti i Partisë Demokratike, Abelard Tahiri dhe zëvendëskryeministri, Besnik Bislimi replikuan, teksa përdorën edhe gjuhë ofenduese.

Zëvendëskryeministri i Kosovës, Besnik Bislimi, tha sot se është kërcënuar nga Abelard Tahiri gjatë seancës parlamentare që po mbahet të enjten.

Por një gjë të tillë po e mohon deputeti, Abelard Tahiri.

“Absolutisht asnjë fjalë të vetme kërcënuese nuk e kam thënë është e pavërtetë. Ju e shihni se qe disa herë rradhazi kur flasin deputetët e opozitës këta dekoncentrojnë, lëshojnë fjalë prej anash dhe gjithmonë me tendencë me i pengu deputetët e opozitës. Juve ju kujtohet edhe incidenti i ma hershëm i zotit Haradinaj pikërisht për këto çështje. Edhe sot ishte situatë e njëjtë, në vazhdimësi ofendojnë e flasin gjatë kohës sa ne jemi në foltore”, ka thënë Tahiri për Insajderin.

Sipas Tahirit, Bislimi e ka të pamundur të qëndrojë pa e penguar sa herë që ky e merr fjalën në foltore.

Tutje, deputeti i PDK-së, ka thënë se është i mirëseardhur çfarëdo hetimi ndaj secilës deklaratë të tij.

“Është i mirëseardhur çfarëdo hetimi ndaj cilës do deklaratë time, asnjë deklaratë të vetme nuk mund ta gjejnë që unë e kam kërcënuar personin në fjalë”, ka përfunduar Tahiri.