Bislimi: 12 milionë euro për regjistrimin e popullësisë

Në ditën e dytë të Javës së Regjistrimit të Popullsisë, zëvendëskryeministri Besnik Bislimi theksoi se shuma e ndarë nga qeveria për këtë projekt është mbi 12 milionë euro, sipas tij që në fund të këtij procesi të ketë një sistem të kompletuar te të dhënave statistikore.

Ai tha se përmes të dhënave të regjistrimit të popullsisë do të marrin më shumë saktësi me të dhëna mbi aktivitetet e ekonomike, financiare dhe ato shërbyese.

Bislimi po ashtu tha se si qeveri janë të gatshëm për bashkëpunim në këtë projekt.

“Si qeveri e shprehim në vazhdimësi përkushtimin dhe gatishmërinë që të ofrojmë në dispozicion të gjitha resurset tona humane, në mënyrë që Agjencia e Statistikave të Kosovës ta përfundojë me sukses këtë aktivitet. Regjistrimi i fundit i popullsisë është mbajtur në më shumë se 10 vjet, andaj kemi shumë nevojë t’i rifreskojmë të dhënat tona demografike, socio-ekonomike. Për këtë projekt ne po ndajmë mbi 12 milionë euro, në mënyrë që në fund të këtij procesi të kemi një sistem të kompletuar te të dhënave statistikore dhe atë plotësisht në vijë me standardet dhe praktikat ndërkombëtare”, tha Bislimi.

Ai shtoi se regjistrimi i popullsisë do të jetë gjithëpërfshirës dhe kualitativ, jo vetëm në aspektin e të regjistruarve, por edhe të personave që përfshihen në anketim.

Emilja Rexhepi, zëvendëskryeministre, tha se regjistrimi i amvisërive dhe banesave është anketa më e madhe statistikore, qëllimi i së cilës është mbledhja e të dhënave bazë për numrin, shpërndarjen territoriale dhe përbërjen e popullsisë sipas karakteristikave demografike e ekonomike.

Ajo tha se autoritetet shtetërore duhet të punojnë në prezantimin, promovimin dhe edukimin e qytetarëve, në mënyrë që regjistrimi të jetë i suksesshëm.

“Regjistrimi nuk perceptohet si çështje statistikore, por politike për të vepruar përmes veprimit politik të qarqeve të caktuara politike në përputhje me numrin e deklarimeve fetare apo kombëtare, që është 100% katastrofike për shtetin dhe ata politikanë elitarë që ne po i shikojmë në planin afatgjatë dhe si qeveri duam ta ndryshojmë atë. Institucionet shtetërore duhen të marrin përgjegjësinë që regjistruesit në terren të jenë nga të gjitha komunitetet nacionale si dhe të flasin gjuhën e asaj popullate… kështu që autoritetet shtetërore duhet të punojnë në prezantimin, promovimin dhe edukimin e qytetarëve në mënyrë që regjistrimi të jetë plotësisht i suksesshëm për të gjithë”, tha Rexhepi.Regjistrimi i popullsisë në Kosovë do të organizohet vitin e ardhshëm, nga data 1 shtator deri më 16 tetor.