Përgjegjësia te ministria: Ja çka i thanë norvegjezët Periskopit për vaksinat e skaduara

Edhe në kontratën që ka siguruar Periskopi, përgjegjësia për shpërndarjen e vaksinave i përcaktohej Ministrisë së Shëndetësisë që udhëhiqet nga Arben Vitia. Periskopi ka kontaktuar me Ambasadën e Norvegjisë në vend, e të cilët dhanë përgjigjen si vijon:

”Ambasada Norvegjeze në Prishtinë nuk ka komente lidhur me këtë çështje. Luteni shumë që ta kontaktoni Ministrinë e Shëndetësisë përgjegjëse për distribuimin e vaksinave në fjalë.”

Gjatë ditës së djeshme u raportua e më pas konfirmua se 133 mijë dozave të vaksinës AstraZeneca iu kishte dalë afati. Por, në fakt një pjese iu kishte skaduar afati edhe më herët.

Skandali i skadimit të afatit të dozave të vaksinave ka ringritur polemikat politike mbi fajësinë e palëve. Ministria e Shëndetësisë dhe Vetëvendosja po akuzojnë Bekim Haxhiun – deputet opozitar – se kishte dekurajuar popullin që të merrte vaksinën në fjalë me shpejtësi.

Kontrata për këto vaksina ishte nënshkruar më 28 qershor, derisa më 3 korrik ato kishin ardhur në Kosovë.

Periskopi ka siguruar kontratën në fjalë  që tregon se një pjese do t’ju skadonte afati edhe më herët se më 31 gusht. Një muaj më herët.

Ndërkaq, dje ministri Arben Vitia tha se ky nuk është lajm i mirë dhe kjo ka ndikuar edhe në mos interesimin qytetarëve për ta marrë këtë vaksinë.

“Sot janë hequr nga administrimi 133 mijë vaksina AstraZenca që ju ka skaduar afati, ky nuk është një lajm i mirë dhe përveç te tjerash kjo ka ndikuar në uljen e interesimit për ta marrë këtë vaksinë, e ne kemi bërë thirrje vazhdimisht që të mos zgjidhet kjo vaksinë sepse nuk e kemi situatën që të zgjedhim. Pasi për ne siguria e vaksinave është parësore dhe nuk kemi pasur kompromise”, theksoi Vitia./PERISKOPI/