Operacioni i FSK-së në Shqipëri: 31 ushtarë të Kosovës dhe 34 zjarrfikës nga AME-ja po ndihmojnë shtetin shqiptar

Toger Ejup Maqedonci në “Info Box” në RTV Dukagjini ka shpalosur detaje rreth përgatitjes së trupave të FSK-së për t’i dalë në ndihmë Shqipërisë në luftën me zjarret.

Ai shtoi se qysh në mëngjes kanë pasur informacion për gjendjen në Shqipëri.

“Në ora 11:00 kemi dërguar një mesazh të brendshëm për njësitë e FSK që të ngrisin gjendjen e gatishmërisë me qëllim zbarkimi në Shqipëri. Në orën 13:00 kemi lëshuar një urdhër paralajmërues, që njësitë të jenë të gatshme që më urdhër operacional të zbarkojnë apo zhvillojnë operacion. Pas lëshimit të urdhrit paralajmërues që është nënshkruar nga gjenerali Rrahman Rama, ka ngrit një forcë për detyrë në FSK të përbërë nga tri skuadrat e kërkim-shpëtimit dhe zjarrfikjes, një skuadër të kompanisë për operacione si dhe policinë ushtarake për përcjelljen e konvojit”, u shpreh Maqedonci.

Ai shtoi se në orën 20:30 të mbrëmjes kanë lëshuar udhërin operacional, dhe se kontingjenti i FSK-së është përbërë nga 31 pjesëtare dhe 34 zjarrfikës nga AME-ja.

“Në ora 20:30 të mbrëmjes kemi lëshuar urdhrin operacional dhe në ora 20:45 njësitë e FSK janë nisur për në Kukës, dhe në ora 22:30 kanë arrit të kontaktojnë autoritetet shqiptare dhe kanë arritur në zonën e Kalimashit ku kishte shpërthyer zjarri. Mbrëmë kanë arrit në vend ngjarje dhe kanë marrë detyrë të vendosen në zonën tjetër në Shën Mëri ku kanë operuar nga pra 06:30 deri në para pak qastesh. 31 pjesëtarë të FSK dhe 34 zjarrfikës nga Agjencia për Menaxhimin e Emergjencave. 9 autocisterna dhe pajisje individuale për zjarrfikje.”, u shpreh Maqedonci.

Maqedonci shtoi se gjendja tash në Shqipëri është dukshëm më e mirë se në ditën e djeshme.