Drejtori i Gjinekologjisë bën thirrje të vaksinohen shtatzënat dhe nënat gjidhënëse

Vetëm gjatë kësaj jave në Klinikën Obstetrike Gjinekologjike në QKUK, trajtim spitalor kanë kërkuar katër shtatzëna, ku njëra prej tyre vazhdon të jetë me oksigjenoterapi.

Drejtor i Klinikës Obstetrike Gjinekologjike në QKUK, Jakup Ismajli thotë se edhe nënat gjidhënëse por edhe ato shtatzënë rekomandohet të vaksinohen, pasi më rrezik është COVID-19 sesa vaksina.

“Një numër i madh i shtatzënave po vaksinohen në tepër botën kështu që nuk po kanë komplikime, kurse edhe tek ato gjidhëniet nuk paraqet asnjë komplikim marrja e vaksinës, mirëpo rekomandohet se komplikimet nga marrja e vaksinës janë disa herë më të vogla sesa sëmundja, kështu si thirrje, si apel rekomandohet që të vaksinohen të gjitha shtatzënat”, u shpreh drejtori i Gjinekologjisë .

Ismajli thotë se gjendja e grave të prekura me COVID-19 që po trajtohen në Klinikën e Gjinekologjisë është stabile.

“Me shtimin e numrit të pacientëve të cilët janë infektuar me COVID, normalisht që rritet edhe numri i shtatzënave që atakohen me këtë infeksion. Për momentin kemi katër shtatzëna të hospitalizuar në repartin për COVID, njëra prej tyre ka lindur dje, ka lindje normale i kemi edhe tri shtatzëna ku njëra prej tyre është me oksigjeno-terapi. Gjendja e tyre në përgjithësi është stabile…”, theksoi Ismajli për KosovaPress.

Ai beson që shtretërit e ndarë në repart të veçantë për të prekurit me coronavirus janë të mjaftueshëm.

“Në repartin e dedikuar për përfundimin e lindjeve dhe për përcjelljen e shtatzënive të pacientëve të atakuar me COVID, i kemi 20 shtretër e kemi sallën e lindjes dhe operacionit, besoj që është e mjaftueshme për ta menaxhuar këtë situatë”, theksoi Ismajli.

Sipas tij, shtatzënat e infektuara janë shtatzënë për herë të parë dhe i takojnë moshës nga 20 deri në 30 vjeçare.

“Ne nuk kemi pasur të rënda, në përjashtim të njërës që dje është pranuar, është me oksigjeno-terapi po shihet që po i atakon edhe moshat e reja sepse të gjitha shtatzënat të cilat janë të atakuar janë të moshës së re…nga mosha 20 deri 30 janë shtatzënitë e para”, u shpreh ai.

Gjinekologu Ismajli thotë se në Klinikën Obstetrike Gjinekologjike në QKUK brenda gjashtëmujorit të parë kanë lidur mbi 4 mijë bebe.

“Në gjashtëmujorin e parë kemi pasur 4 mijë e 210 lindje nuk vërehet ndonjë rënie në krahasim me vitin e kaluar, shifrat do thotë janë ekuivalente me vitin 2020”, deklaroi ai.