Varfëria cullak: Mbi 2 milionë do t’i marrë një kompani private për të ekspozuar menjëherë veturat e paregjistruara

Ministria e Infrastrukturës njoftoi popullin se ata do të paguanin edhe nga 4 euro e 90 cent shtesë për një tiketë ngjitëse.

Por, çka është ajo? Qëllimi i deklaruar nga Ministria e Infrastrukturës është konfirmimi i kontrollimit teknik të automjeteve, e që po ashtu i ekspozon para Policisë të gjitha veturat e paregjistruara.

Ministria e Infrastrukturës e ka nënshkruar marrëveshjen me kompaninë “Auto Control Kosova”, përcjell Periskopi.

Dhe, kjo do të kushtojë!

Çdo qytetar që prej shtatorit e regjistron automjetin e tij do të paguajë 4 euro e 90 cent.

Bazuar në statistikat e vitit të kaluar dilte se 370 mijë vetura kishin regjistruar veturat e tyre. Kjo nënkupton se në rast të regjistrimit të 370 mijë veturave në vit, kompania “Auto Control Kosova” do të arkëtojë 1 milion e 813 mijë euro.

Dhe, nëse numri i veturave të paregjistruara që është rreth 200 mijë i shtohet numrit 370 mijë të veturave të regjistruara, atëherë shuma që do të arkëtohet nga kompania në fjalë është 2 milionë e 793 mijë euro.

Drejtori i Byrosë Kosovare të Sigurimeve [BKS], Sami Mazreku, ka deklaruar se “pavarësisht shumës që do të paguhet” kjo do të ndikojë pozitivisht në uljen e qarkullimit të veturave të paregjistruara.

Pra, kjo nënkupton se shteti do të detyrojë qytetarët që të paguajnë nga 4 euro e 90 centë në mënyrë që qytetarët e varfër të vendit me vetura të paregjistruara të regjistrojnë ato vetura.

Më vonë gjatë ditës Periskopi do të njoftojë më shumë për rastin.

Deri tash, ish kryeministri Ramush Haradinaj ka ftuar qytetarët që të protestojnë për këtë veprim të Ministrisë së Infrastrukturës. /Periskopi