“S’ndodh kjo askund në botë”: Simmons tregon presionin e Ambasadave për raste të caktuara politike

Deputeti i PDK-së, Hajdar Beqa pyeti Simmonsin se a kishte pasur presion politik nga shtetet anëtare të BE-së për t’u marrë me raste të caktuara.

Simmons që e kishte përmendur një gjë të tillë edhe në raportimin e tij, e pohoi një gjë të tillë, përcjell Periskopi.

Ai deklaroi se EULEX-i kishte hapur rast disiplinor ndaj tij që “ta hiqnin qafe”.

“Ka pasur takime të rregullta mes gjyqtarëve të EULEX-it dhe ambasadave të tyre. Unë kam qenë pjesë e Ambasadës Britanike për çdo javë. Përveç këtyre rasteve kam qenë pjesë e takimeve të stafit.” – deklaroi Simmons duke pranuar ndërhyrjet politike në Eulex.

“Kam edhe e-maile që përmbajnë gjithë gjurmin e-maile që merreshin me rastet që ishin prioritare nga ambasadat. Po, EULEX-i i ka dashur disa gjyqtarë të caktuar, sidomos nga Lindja. Ata gjyqtarë po merrnin shumë më shumë para se sa që do të merrnin në vendet e tyre. Asnjëri prej këtyre gjyqtarëve nuk donte që misioni të përfundonte. Disa prej tyre do të bënin gjithçka që të kryenin punën.” – vazhdoi ai.

“Rasti Kleçka është një rast i cili për mendimin tim kurrë s’është dashur të çohej në gjyq. S’mendoj që ka ndonjë vend në botë ku me aq dëshmi të dobëta do të shkohej në sallë të gjyqit. Rasti u ndërtua në evidencën e një dëshmitari të vetëm, që kishte histori të sëmundjes mendore, me dëshmi që kundërshtohej nga evidenca forenzika. Nëse ai rast do të hapej në Angli do të përqeshej në gjykatë. Por, ky ishte rast i rëndësishëm për dialogun.” – tha z. Simmons./Periskopi