Qeveria hoqi dorë nga ‘tiketat ngjitëse’: Si e shpëtoi Periskopi popullin nga zhvatja dhe monopoli?

Më 8 qershor 2021, Hysen Durmishi kishte marrë vendim që ta nënshkruante Marrëveshjen për tiketat ngjitëse që do t’i vendoseshin automjeteve nga 1 shtatori i po këtij viti. Kjo marrëveshje i jepte kompanisë “Auto Control Kosova” mundësinë që t’i fitonte deri në 11 milionë euro për 5 vitet e ardhshme sa zgjaste kontrata.

Prej 8 qershorit deri më 15 korrik nuk kishte ndodhur asgjë.

Më 15 korrik, Periskopi publikon një artikull në të cilin tregon se si po bëhej monopoli dhe zhvatja dhe se si do ta vuante populli i varfëruar edhe më shumë nga pandemia këtë situatë.

Disa orë pas artikullit të titulluar “Monopoli me tiketat e automjeteve: “Qytetarëve të Kosovës do t’iu kushtojë deri në 11 milionë euro (Kontrata)” reagoi edhe Hysen Durmishi.

Ai deklaroi se nënshkrimin e tij e kishte  bërë pas muajsh të tërë konsultimesh me Zyren Ligjore.

Periskopi nuk i shpëtoi sulmeve të shumta verbale që e shihnin raportimin e saj ‘të ndikuar politikisht’. Sidoqoftë, një pjesë e madhe qytetarësh ishin të shqetësuar me gjithë atë që po ndodhte.

Gazeta lajmëroi se për një tiketë qytetarët do të paguanin nga 4 euro e 90 centë. Nga hulumtimi i tregut mësoi se një tiketë e tillë ngjitëse do të kushtonte më pak se një cent.

Dhe, më 22 korrik Hysen Durmishi me Ministrinë e Infrastrukturës bëri atë që duhej ta bënte: pezulloi marrëveshjen për tiketa ngjitëse.

Çka tha kjo Ministri?

Durmishi deklaroi se “pas nënshkrimit të marrëveshjes dhe vëmendjes së madhe të opinionit publik kam gjetur dokumente e raporte që janë kontradiktore me njëra-tjetrën.”

Por, në fakt kjo deklaratë bie ndesh me deklaratën e 15 korrikut [prapë pas nënshkrimit] ku deklaronte që nënshkrimin e kishte dhënë pas konsultimeve të bëra vazhdimisht me Zyren Ligjore të kësaj ministrie.