‘BE’ja s’ka faj për gabimet e Kosovës’, Opozita e shoqëria civile kritikojnë ashpër ministren Schwarz

Gjatë ditës së djeshme, ministrja e Punëve të Jashtme e Kosovës, Donika Gërvalla – Schwarz ka mbajtur në fjalim në Forumin e Dubrovnikut, fjalim ky që është komentuar e kritikuar shumë gjatë ditës së djeshme.

Në këtë fjalim të sajin, Schwarz ka thënë se Bashkimi Evropian nuk është fajtore për gabimet e Kosovës dhe të vendeve të Ballkanit Perëndimor, duke arsyetuar kështu mosliberalizimin e vizave dhe mos’hapjen e negociatave për pranim në BE, për Maqedoninë e Veriut dhe Shqipërinë, shkruan Gazeta Metro.Fjalimin e plotë të saj, Schwarz e publikoi edhe në Facebook, ndërsa kritikat filluan menjëherë pas raportimit të mediave për këtë pjesë të deklaratës së saj, ndërsa, ajo zgjodhi që t’i kritikojë mediat për ‘fake news’, derisa në fjalim kishte folur për lirinë e mediave.

“Prandaj, por mbi të gjitha për veten tonë, ne duhet të përmbushim detyrat tona: Duhet të ndërtojmë shtetin ligjor, duke përfshirë edhe të qenit të ashpër ndaj korrupsionit. Duhet të garantojmë lirinë e shtypit dhe të bëjmë reformë të vërtetë ligjore. Ne ende nuk kemi arritur aty. Dhe nuk asnjë arsye pse ta fajësojmë BE-në për gabimet tona. Askush nga ne nuk do të duhej të mashtronte veten duke thënë apo menduar që mund të hyjmë (në BE) pa i kryer punët tona.”, ishte deklarata e Schwarz që bëri bujë.

E para që reagoi ndaj Schwarz ishte nëtarja e Partisë Demokratike të Kosovës dhe ish-ambasadorja e Kosovës në Shtetet e Bashkuara të Amerikës, Vlora Çitaku e cila i tha ministres së Punëve të Jashtme të Kosovës, Donika Gërvalla – Schwarz se nuk duhet të shtrembërohet e vërteta në dëm të Kosovës dhe se e ka detyrë ta plasojë Kosovën në dritën e saj më të mirë.

“E nderuara Ministre, Para pak javësh në Prishtinë, Ministri i Punëve të Jashtme të Gjermanisë konfirmoi atë të cilën Komisioni Evropian dhe Parlamenti Evropian po e përsërisin tani e disa vite: Kosova ka përmbushur të gjitha kriteret për liberalizimin e vizave. Keni parasysh, qytetarët e Venezuelës, Kolumbisë e shumë të tjerë deri në Taiwan mund të udhëtojnë pa viza në BE. Askush nuk po thotë se Kosova është gati sot të jetë anëtare e BE-së, sepse ne kemi ende për të bërë në luftën kundër korrupcionit, në sundimin e ligjit dhe në përjetësimin e vlerave evropiane. Por, ta keni të qartë, as brenda BE-së nuk ka uniformitet në zbatimin e vlerave dhe standardeve. Jo të gjitha vendet e BE-së janë në nivelin e Finlandës apo Suedisë.Por, mbi të gjitha, ju jeni Ministre e Jashtme e Kosovës. Detyra e juaj është ta plasoni Kosovën në dritën e saj më të mirë. Jo të mos e thoni të vërtëtën, por as mos ta shtrembëroni atë.”, shkroi Çitaku.