6 persona vdesin nga përmbytjet në Gjermani, zhduken dhjetëra të tjerë

Të paktën gjashtë persona kanë humbur jetën dhe dhjetëra të tjerë janë zhdukur në Gjermani pasi shirat e rrëmbyer i kthyen rrugët në përrenj të furishëm, duke marrë përpara makinat dhe duke shkaktuar shembjen e disa ndërtesave.

Policia në qytetin perëndimor të Koblenz tha të enjten se katër njerëz kishin vdekur në qarkun Ahrweiler dhe rreth 50 ishin bllokuar në çatitë e shtëpive të tyre në pritje të shpëtimit.

Autoritetet kanë shpallur një emergjencë në rajon pas ditësh reshje të mëdha shiu. Pjesë të mëdha të Gjermanisë perëndimore dhe qendrore, si dhe vendet fqinje kanë pësuar dëme të mëdha.

Policia tha se një 82-vjeçar vdiq pas një rënie në bodrumin e tij të përmbytur në qytetin perëndimor të Wuppertal, i cili ishte ndër më të goditurit.

Një zjarrfikës u mbyt të mërkurën gjatë punës së shpëtimit në qytetin perëndimor gjerman të Altena, dhe një burrë tjetër ishte zhdukur në qytetin lindor të Joehstadt pasi u zhduk ndërsa po përpiqej të siguronte pronën e tij nga ngritja e ujërave, thanë autoritetet.

Shirat e pamëshirshëm gjatë natës përkeqësuan kushtet e përmbytjes edhe në Belgjikën lindore, ku një person u raportua i mbytur dhe të paktën një tjetër ishte zhdukur./Top-Channel