Rezerva e FSK-së dhe Zotëriu i Parë, Prindon Sadriu luan rolin e ambasadorit në Maqedoni

Përmes rrjetit social Twitter, Prindon Sadriu ka konfirmuar se po qëndron në këtë pozitë dhe se ka takuar ambasadorin e Shqipërisë në Maqedoni, Fatos Reka, me të cilin kanë biseduar për zhvillimet e fundit.

Pas largimit të Gjergj Dedajt nga pozita e ambasadorit në këtë shtet, shef i misionit diplomatik të Kosovës në Maqedoni në cilësinë e të ngarkuarit me punë është bashkëshorti i Presidentes Osmani. Po deri më tani Presidentja dhe as ai asnjëherë nuk janë përgjigjur rreth kësaj çështje.

Kujtojmë që Prindon Sadriu është diplomat i karrierës në Ministrinë e Punëve të Jashtme. Ai në pozitën e zëvendës-shefit të misionit të Kosovës në Maqedoni ishte emëruar në korrik të vitit 2019.

Në anë tjetër, Betim Gjoshi i PDK-së, po e sheh si shkelje flagrante të ligjit dhe konflikt interesi avancimin e burrit të Vjosa Osmani si ushtrues detyre të ambasadorit.

Gjoshi gjithashtu ka thënë se Vjosa Osmani po tregohet e paaftë në menaxhimin e doplomacisë kosovare dhe se asaj po i bëhet presion politik nga Vetëvendosje e Albin Kuriti.

“Presidentja Osmani po tregohet e paaftë në menaxhimin e diplomacisë kosovare.
Zonja Osmani po tregohet e dobët përmes vendimeve të saj tërësisht politike të shtyrë nga presioni politik i Vetëvendosjes dhe nga interesi i ngushtë personal.”

“Sot, me dhjetëra misione diplomatike janë me përfaqësime të gjymtuara. Kjo e dëmton edhe më shumë pozicionin e Kosovës në politikën e jashtme, sidomos në këtë periudhë.”

“Përveç që e ka dëmtuar diplomacinë e Kosovës me vendimin e saj tërësisht politik, ajo po dëshmon se në një rast ajo është ndikuar nga interesi i ngushtë personal – për ta avancuar burrin e saj, qoftë edhe përkohësisht.”

Kjo është në shkelje flagrante të ligjit për parandalimin e konfliktit të interesit. Zonja Osmani nuk ka qenë as e paanshme dhe as objektive në vendimin e saj. Ajo nuk i është shmangur interesit privat përmes vendimit të saj që e avancon bashkëshortin e saj në misionin diplomatik ku vepron.”, ka shkruar ai, transmeton Periskopi.

Ndryshe, muajin e kaluar, me anë të dekreteve Osmani ka shkarkuar 12 ambasadorë të Kosovës nëpër botë me arsyetimin se janë të emëruar politikisht, vendim ky që u kritikua mjaftë shumë./Periskopi/