Qeveria miraton pakon për rimëkëmbje ekonomike në vlerë prej 420 milionë euro

Ministri i Financave, Hekuran Murati, në një konferencë për media ka thënë se tash është momenti që shteti të intervenojë me një pako të ringjalljes ekonomike.

Sipas Murati, kjo pako është e përfshirë në buxhetin e rishikuar të cilin e kaloi qeveria në mbledhjen e mbajtur sot ndërsa shuma e përgjithshme e pakos së ringjalljes ekonomike është 420 milionë euro, ku financimi nga të hyrat buxhetore është 190 milionë euro ndërsa 230 milionë euro të tjera janë nga huamarrja.

Masat janë të ndara në pesë kategori duke filluar me mbështetjen e punësimit, e cila kapë vlerën prej 50 milionë euro intervenim direkt.

Grupit tjetër i masave ka të bëjë me ringjalljen e ekonomisë dhe të prodhimit që dedikohet për bizneset dhe kapë vlerën prej 108 milionë euro, kurse grupi i tretë i masave ka të bëjë për familjen dhe kap shifrën e 50 milionë euro në tërësi.

Grupit i katër i masave në këtë pako është i destinuar për mbështetjen për shërbimet publike në vlerë prej 112 milionë euro, ku 40 milionë euro janë të ndara për blerjen e vaksinave në luftën kundër pandemisë COVID-19.

“Këtu kemi mbështetjen për shëndetësinë, ku 40 milionë euro janë të ndara për blerjen e vaksinave për luftën kundër pandemisë, tetë milionë euro të tjera janë të dedikuara për blerjen e barnave esenciale në kuadër të ShSKUK-së dhe janë rreth pesë milionë euro të tjera të cilat janë të ndara për mbulimin e kostos së shpenzimeve për specializantë të rinjë, pra gjithsej 53 milionë euro”, është shprehur Murati në konferencë për media.

Ndërsa, grupi i fundit i masave ka të bëjë me investimin në infrastrukturë dhe ambient që në tërësi ka vlerë 100 milionë euro.