Nushi: Kurti thoshte s’takohem me pasuesit e Millosheviqit, sot piu kafe e hëngri kroasant me Vuçiqin

Në një lidhje direkte për emisionin “Frontal”, në T7. Nushi tha se dikur Kurti thoshte se nuk ulej në tavolinë me pasuesin e Sllobodan Millosheviqit, teksa theksoi se pikërisht kryeministri sot piu kafe në një tavolinë me ish-ministrin e Millosheviqit, Aleksandër Vuçiq.

“Mu duk një paraqitje tipike e z.Kurtit që dëshiron të bëjë ‘show’ dhe që dialogu për të nuk është marrë seriozisht. E dialogu duhet të merret seriozisht nga Kosova. Shumë shtete ende nuk na njohin. Si rrjedhojë e kemi të pamundur shfrytëzimin tonë shtetëror për shkak të këtyre bllokadave. Pikërisht në mungesë të kësaj marrëveshje ka shumë shtete që nuk po na njohin. Mendoj që duhet të ketë një vullnet që e tejkalon egon e Kosovës. E mendoj që z.Kurti nuk e ka këtë vullnet”, deklaroi Nushi.

Ai më tutje tha se kryeministri Kurti ka premtuar shumë, por se tani ai sipas Nushit nuk po i mbanë premtimet.

“Z.Kurti na ka premtuar shumë sene dhe e kemi parë që i ka harruar të gjitha ato premtime. Nuk i besoj fjalës së z.Kurti. ia shoh veprat dhe mendoj që është një njeri shumë jokonsistent. Përderisa ne thonim se nuk  ulemi në tavolinë me pasuesit të Millosheviqit, ai sot u ul në tavolinë me Vuçiqin dhe piu kafe e hëngri kroasant. Ai vet ka thënë gjatë fushatës që nuk ulet në një tavolinë me pasuesin e Millosheviqit”, deklaroi ai.

Nushi theksoi se Kosova duhet të mësohet që të lëshojë pe në gjëra qqë janë në interes të vendit.

“Kur futesh në dialog nuk mundësh të mos lëshosh pe. Ne duhet të shohim se për çfarë po lëshojmë pe. Çfarë po marrim në këmbim. E jo gjithmonë të shohim se vetëm çfarë po merr Serbia”, ka thënë ai.