Milazim Krasniqi: Për keqardhje që Meta përfundoi karrierën si përçarës

Sipas Krasniqit, Meta bëri gabime të njëpasnjëshme, të cilat i kushtuan sot. 104 deputetë të Kuvendit të Shqipërisë votuan nismën për shkarkimin e presidentit shqiptar, 7 të tjerë ishin kundër, ndërsa tre prej tyre abstenuan.

“Mendoj që Ilir Meta vërtet nuk ëshë sjell si president, sepse i kanë mbetur aksionet në partinë e tij, në LSI dhe gruaja e tij ka qenë kryetare e partisë. Ai është sjell si patron i partisë dhe ky është një përfundim fatkeq dhe është për keqardhje që Meta nuk e ka shfrytëzuar rastin si një politikan me kontribute reale në skenën politike që ta përfundonte karrierën politike si një president që do të mbahej mend si faktor unitet dhe jo si faktor përçarës”, ka thënë Krasniqi.

Profesori universitar për KosovaPress tha po ashtu se Edi Rama si politikan makiavelist shfrytëzoi situatën që krijoi vetë Meta me veprimet e tij, të pamenduara mirë.

Në gjithë këtë proces, Meta është humbësi i vetëm, thotë Krasniqi.

“Unë besoj se Edi Rama ka pozitë jashtëzakonisht të fortë edhe me mandatin e tretë që ka fituar, ka përkrahje ndërkombëtare dhe në këtë aspekt dobësimi i Metës është evident. Kështu që në momentin që po flasim, nuk ka kalkulime se Meta mund të shkaktojë trazira apo ka për të bërë ndonjë gjë. Varet se si do të sillet PD-ja e Shqipërisë, por edhe ajo është para procesit zgjedhor, të cilin e ka me datën 13. Nuk besoj se ajo do t’i bashkohej ndonjë kauze të Metës për destablizim. Nga ajo që po them, momentalisht shihet se Meta do të bëjë zhurmë në media, të përpiqet ta hestirizojë publikun, por në esencë nuk ka fuqi për të bërë ndonjë gjë, sepse partia e tij është dobësuar jashtë mase. Ndërsa, Edi Rama është në kulmin e fuqisë së vetë politike”, deklaroi ai.

Ilir Meta u shkarkua sot për shkelje të rënda të Kushtetutës, të cilat u konkluduan nga raporti i Komisionit Hetimor, të inicuar nga socialistët. Sipas të njëjtit Komision, Meta bëri shkelje të 17 neneve.

Kushtetuta parasheh që vendimi i Kuvendit për shkarkimin e Metës t’i dërgohet Gjykatës Kushtetutese, e cila do ta japë verdiktin për këtë çështje.

Kreu i shtetit, Ilir Meta nuk është paraqitur në asnjë prej seancave të Komisionit Hetimor, pavarësisht thirrjeve që iu bënë nga deputetët e PS-së. Madje, ai deklaroi se nuk do të njoh asnjë veprimtari të një kuvendi ‘njëpartiak’ dhe se do të ushtrojë detyrën e tij deri më 24 korrik të vitit 2022.

Kujtojmë se Gjykata Kushtetuese e Shqipërisë, që është pjesë kyçe e procesit të shkarkimit të presidentit, pas një krize të gjatë mosfunksionimi, ka filluar punën në janar të këtij viti, ndonëse ende nuk është e kompletuar plotësisht.