LDK nuk i jep nënshkrimet për dërgimin e Osmanit në Kushtetuese: Po presim veprime nga Avokati i Popullit

Kësisoj U.D së kryetarit të PDK-së, Enver Hoxhaj deklaroi sot se janë mbledhur nënshkrimet për dërgimin në Kushtetuese të vendimit të Vjosa Osmanit për shkarkimin e Dakës.

“Partia Demokratike e sheh të domosdoshëm dhe të pashmangshëm opinionin e Gjykatës Kushtetuese, për çka i kemi mbledhur edhe nënshkrimet. Faleminderit të gjithë deputetëve të opozitës për bashkëpunimin në këtë çështje”,tha Hoxhaj.

Por ende të papërcaktuar për nënshkrime janë deputetët e Lidhjes Demokratike të Kosovës.

I kontaktuar nga lajmi.net, shefi i Grupit Parlamentar të LDK-së, Arben Gashi ka deklaruar se vendimin e Osmanit për shkarkimin e Dakës e shohin si antikushtetues, por që ende nuk kanë dhënë ndonjë nënshkrim për dërgimin e kësaj çështje në Gjykatën Kushtetuese.

“Ende s’ka nënshkruar kërkush. Jo, ende nuk jemi koordinuar për këtë çështje”, tha Gashi.

Ai madje deklaroi se janë në pritje të qëndrimit dhe veprimit të institucionit të Avokatit të Popullit, në mënyrë që ai të bëjë drejtimin e kësaj situate.

“Ne po presim qëndrimin e institucionit të Avokatit të Popullit dhe po presim që ai ta drejtojë këtë çështje.E më pas do të shohim hapat tutje. Vendimi në përgjithësi mendojmë se është antikushteutes”, deklaroi ai.

I pyetur nëse do të nënshkruajnë për dërgimin në Kushtetuese të këtij vendimi të presidentes Osmani, Gashi tha se është hipotezë për të cilën s’duan të japin përgjigje.

“Është hipotezë të cilën s’du të jap përgjigje”, shtoi ai.

Duhet përkujtuar që për disa vite radhazi Vjosa Osmani ishte pjesë e partisë Lidhja Demokratike e Kosovës, por që krisjet me këtë parti nisën pak kohë para se ajo të vihej në postin e presidentes.

Madje brenda Grupit Parlamentar të LDK-së pati deputetë të tillë që vendosën të mos merrnin fare pjesë në votimin e Osmanit për presidente.

Siç duket edhe në këtë rast, deputetët e LDK-së vazhdojnë të mos “përzihen” sa i përket vendimeve të Osmanit, apo të ish-bashkëpartiakes së tyre.

Pas shkarkimit të Dakës tri ditë më parë, reagime të shumta pati në drejtim të Vjosa Osmani. Përfaqësues të Shoqërisë Civile si dhe njohës të Çështjeve Ligjore Kushtetuese e quajtën këtë vendim antikushtetues dhe jo të duhur nga ana e presidentes Osmani.

Pas shkarkimit të Dakës, Osmani emëroi Kushtrim Radoniqin në krye të Komisionit Qendror Zgjedhor.
Është vetë Radoniqi i cili deklaroi sot që në rast se Kushtetuesja e parasheh që Daka duhet të kthehet në drejtim të KQZ-së ai largohet, ndërsa ajo kthehet.