Avokati i Popullit i thotë Periskopit se ka nxjerrë ‘periskopin’ për të shqyrtuar shkarkimin e Dakës

Avokati i Popullit në një përgjigje për Periskopin ka thënë se institucionet që ushtrojnë pushtet në vend, përfshirë këtu edhe Presidentin, duhet të kenë kujdes kur të marrin vendime lidhur me institucionet e pavarura.

Avokati i Popullit po ashtu, po presin të analizojnë dhe vlerësojnë këtë shkarkim që të dalin më pas me një qëndrim konkret.

“Avokati i Popullit tërheq vëmendjen lidhur me faktin se çdo organ, institucion ose autoritet tjetër që ushtron pushtet në Kosovë, duhen të kenë kujdes kur marrin vendime që kanë të bëjnë me institucionet e pavarura. Ruajtja e pavarësisë së institucioneve të pavarura është parakusht për funksionim të demokracisë dhe sundimit të ligjit.

Lidhur me pyetjen tuaj, na duhet një analizë për këtë rast sepse pa një vlerësim paraprak nuk mund të dalim me një qëndrim konkret”, thuhet në përgjigjen e Avokatit të Popullit dhënë Periskopit.

Gjatë ditës së djeshme ka folur edhe Valdete Daka e cila për media ka thënë se shkarkimi i saj është bërë me motive politike dhe se do të shoh nëse do ta dërgojë rastin në Gjykatën Kushtetuese.

Ndërkohë një nga zërat më të fuqishëm të VV-së në KQZ, Sami Kurteshit, në një prononcim për Periskopin ka thënë vendimi është marrë nga presidentja dhe nuk ka komentuar mbi disa pika të vendimit ku përfshihet edhe ai.

Ndryshe, menjëherë pas shkarkimit të Dakës në pozitën e kryesuesit të KQZ-së është emëruar Kreshnik Radoniqi./Periskopi/