Haki Abazi pasi Qeveria Kurti II pagoi rrymën e serbëve në Veri: Duhet analizë

Shumë qytetarë duke e njohur angazhimin fanatik të Vetëvendosjes kundër pagesës së rrymës për serbët e Veriut që refuzojnë të paguajnë faturat e tyre si të gjithë ne të tjerët, sigurisht se kanë kureshtje për ta kuptuar arsyetimin kësaj partie që kur erdhi në pushtet e bëri po të njëjtën gjë.

Por, natyrisht që përgjigja nuk është e thjeshtë dhe auto-kritike.

Haki Abazi ka thënë se është e rëndësishme t’i jepet fundi “sagës së pagesave të rrymës për serbët e Veriut” edhe pse një gjë e tillë ashiqare nuk u bë nga Qeveria Kurti II.

Sidoqoftë, ai ka kërkuar analizë të “keqpërdorimeve” të bëra në 20 vitet e fundit për “mos-pagesën e rrymës nga qytetarët tanë serbë në veri”.

“Besoj që ka ardhur koha që Qeveria jonë të bëj zgjidhjen e përhershme [të energjisë elektrike në veri] e që është shumë e thjeshtë: 1) është privatizuar distribucioni [kemi KEDS-in] e i cili duhet t’i marrë përsipër asetet atje… mendoj që zgjidhja afat-shkurtër do të ishte që ne t’i japim borxh furnizuesit dhe menaxhimit të rrjetit dhe një herë e përgjithmonë t’i japim fund pagesës së rrymës së qytetarëve në veri me para të qytetarëve.”

“Tjetra është plani: nuk bën të kërkohet vetëm nga Qeveria. Duhet që edhe operatorët privatë ta sjellin planin e furnizimit të energjisë dhe mbledhjes së faturave të qytetarëve.” – ka shtuar ai.

Në fakt, të gjithë janë të vetëdijshëm se KEDS dhe KESCO nuk kanë pasur mundësi të kryejnë punën e tyre për shkak të problemeve politike që ekzistojnë në Kosovë me pjesën e serbëve të Veriut që politikisht kontrollohen nga Republika e Serbisë. /Periskopi