Zhvillimet në Hagë: OVL UÇK në mjegull për arrestimin Komandant Ujkut nga Specialja

Nga Organizata e Veteranëve të Luftës së Ushtrisë Çlirimtare të Kosovës (OVL – UÇK) kanë thënë se nuk kanë informacione për këtë rast, shkruan Periskopi.

Periskopi ka kontaktuar me sekretarin e OVL-UÇK‘së, Faton Klinaku për të marrë informacione më shumë për rastin e ish-komandantit Pjetër Shala.

Mirëpo, Klinaku i tha Periskopit se nuk ka informacione më shumë por vetëm lajmet që po qarkullojnë në media.

“Jo nuk kemi informacione, vetëm ato që po qarkullojnë në media”, u shpreh Klinaku

Ndërkohë, Dhomat e Specializuara thanë dje përmes një komunikate për media se së shpejti do të publikohet aktakuza kundër Pjetër Shalës.

“Së shpejti do të jepet më shumë informacion ku do të përfshihet edhe informacion për nxjerrjen publike të aktakuzës së konfirmuar me redaktimet e nevojshme. Në bazë të rregullës 88 të Rregullores së Procedurës dhe Provave, aktakuza bëhet publike jo më vonë se paraqitja e parë e të akuzuarit”, kështu u deklaruan nga Specialja.

Ndërkohë, Pjetër Shala u arrestua dje nga autoritetet belge në shtetin që është në kufi me Holandën, vendin ku ndodhet paraburgimi në të cilin po pret që të dërgohet. Arrestimi i tij u bë në bazë të një urdhërarresti të lëshuar nga Gjykata Speciale me seli në Hagë.

Shala, i cili gjatë viteve 1998-1999 kishte shërbyer në zonën e Dukagjinit si komandant në fshatin Dujakë, akuzohet për krime lufte. Aktakuza kundër tij është konfirmuar nga gjykatësi i procedurës paraprake të Speciales.

Në shkurt të vitit 2019, Shala kishte thënë se ishte intervistuar nga hetuesit e Zyrës së Prokurorit të Specializuar në Hagë si i dyshuar./Periskopi/