Spahiu denoncon vendimin e Gjykatës Supreme: U goditën themelet e demokracisë

Ai e ka quajtur një veprim “kundër interesit të Kosovës” vendimin e PZAP-it dhe Gjykatës Supreme të cilat pardje ia ndaluan komuniteteve pakicë të votonin jashtë vijave etnike.

“Vendimi i PZAP dhe Gjykatës Supreme godet themelin e demokracisë në Kosovë sepse penalizon të drejtën e pjesëtarëve të një komuniteti etnik për të votuar për përfaqësuesin e komunitetit tjetër etnik.” – ka thënë z.Spahiu, përcjell Periskopi.

Në bazë të vendimit të Supremes, u denoncua ‘orkestrimi’ i votave nga Adrijana Hoxhiq dhe Iniciativa Rome me arsyen se kishte pasur më pak anëtarë të komuniteteve që përfaqësojnë se vota për ta.

Nuk dihen arsyet prapa një vendimi të tillë nga ana e Gjykatës Supreme.

Statusi i plotë:

PZAP e Gjykata supreme kanë  vepruar së pari kundër interesit të Kosovës në aspektin afatgjatë dhe e dyta në mënyrë kundërligjore e kundër frymës së Kushtetutës së Kosovës. Vendimi i KZAP dhe Gjykatës Supreme godet themelin e demokracisë në Kosovë sepse penalizon të drejtën e pjesëtarëve të një komuniteti etnik për të votuar për përfaqësuesin e komunitetit tjetër etnik. Askund në fletë-votim nuk shkruan se pjesëtarët e X komunitetit etnik duhet të votojnë vetëm për ndonjërën nga partitë që përfaqësojnë X komunitetin etnik. Madje nga lista e partive në fletën e votimit vetëm KQZ mund ta dijë se cila parti cilin komunitet përfaqëson se votuesi edhe mund të mos e di.