Salihu: Jerusalemi dëshmoi që Biden do ta vazhdojë politikën e jashtme si Trumpi

Analisti dhe hulumtuesi Fitim Salihu, thotë se politika e jashtme e Donald Trump ‘duket të ketë qenë e suksesshme’.

Kjo, pasi sipas tij, këtë politikë është duke e ndjekur edhe presidenti Joe Biden.

Sipas Salihut, kjo dëshmohet edhe në rastin e Kosovës, përkatësisht me hapjen e ambasadës tonë në Jerusalem.

Ai shkruan në Facebook:

Përkundër shumë vërejtjeve ndaj Trampit mbi politikat e tij të brendshme, politika e tij e jashtme, parë nga sot, duket të ketë qenë e suksesshme dhe e duhur. Këtë e dëshmon fakti që edhe administrata Bajden po vazhdon t’i ndjek shtyllat kryesore të politikës së jashtme të vendosura nga Trampi – përballja me Kinën dhe marrëveshjet paqësore në Lindjen e Mesme. Natyrisht, këtu hynë edhe marrëveshjet e nënshkruara me Kosovën dhe Serbinë. Në të gjithë këto pika, Bajdeni është zotuar për vazhdimësi.

Prioritizimi i përmbajtjes së ekspansionit gjeopolitik të Kinës në politikën dhe ekonominë globale, shoqëruar me pesë marrëveshje mes Izraelit dhe shteteve me shumicë myslimane (me tri shtete të tjera me shumicë myslimane gati për të nënshkruar marrëveshje me shtetin izraelit) dhe krijimi i aleancave për t’iu kundërvënë Iranit (përfshirë marrëveshjen mes dy rivalëve të Gjirit, Arabisë Saudite dhe Katarit) janë trashëgimi e politikës së jashtme të Trampit, e cila po vazhdon edhe me Bajdenin.

Në këtë mes gjendet edhe Kosova. Stejt Departmenti i administratës Bajden ka pohuar se do t’i qëndrojë prapa projekteve të Trampit për marrëvëshjet me Kosovën e Serbinë dhe për marrëveshjen mes Kosovës e Izraelit për njohje reciproke dhe vendosjen e ambasadës kosovare në Jerusalem.