Me ardhjen në pushtet, Konjufca merr qëndrimin e Hashim Thaçit për Bashkimin Kombëtar

Vetëvendosje nuk reshte së kritikuari ish pushtetarin Hashim Thaçi se kishte shkelur “Betimin e UÇK-së” dhe idealin për Bashkim Kombëtar.

Por, tashmë krejtësisht e pasfiduar nga militantët e saj të zjarrtë pro-Bashkim, ajo duket se po shkon në të njëjtin drejtim me Thaçin, apo edhe më keq.

Thaçi kishte ri-përsëritur vazhdimisht se rrethanat e pamundësonin një Bashkim të tillë, ani që kishte pasur një episod interesant gjatë viteve 2018 dhe 2019.

Ish presidenti i Kosovës që tashmë ndodhet në paraburgim në Hagë, derisa po vizitonte Shqipërinë kishte inkurajuar politikën e të dyja shteteve që të punonin në këtë drejtim, shkruan Periskopi.

“Do të jetë shumë më e lehtë të realizohet ëndrra e një hapësire pa kufij midis Kosovës dhe Shqipërisë sesa sfida e largimit të Serbisë nga Kosova. Dhe kjo do të ndodhë,” – kishte thënë ai.

“Janë krijuar rrethana të reja dhe zgjidhja më e mirë do të ishte që dy parlamentet e Kosovës dhe Shqipërisë të miratojnë deklaratat e dëshirës së njerëzve për të jetuar në një shtet të vetëm.” – kishte shtuar më tej Thaçi.

Por, çka tha dje Konjufca?

Duket se pushtetarët e rinj janë larguar edhe më shumë se Thaçi nga Bashkimi Kombëtar.

Deklarata e Konjufcës e pason atë të bërë nga Albin Kurti, i cili kishte zbuluar pas njëzet viti promovimi të idesë se “Kushtetuta e Kosovës e pamundësonte një gjë të tillë”.

“Unë konsideroj Adriatik, se politika është me vepru ne rrethana. Janë disa dimensione te tjera në të cilat kryen pune edhe ëndrra, por ato janë të tjera. Me ato nuk do te merremi sepse tash jemi në politikë. Politika është me vepru brenda realitetit. Çka është me vepru brenda realitetit? Kosova e ka të pamumdshme me një tik te lapsit ta bej bashkimin me Shqipërinë.” – tha ai në  një emision debatues të mbrëmshëm.

Ndërkohë, në kuadër të fshirjes së komunikatave të saj, Vetëvendosje ka fshirë edhe ato ku shprehte kërkesën për Bashkim Kombëtar. /Periskopi