Hoxhaj: Seanca e sotme shkoi mirë, nuk pati tym e gaz

Kryetari i PDK-së, Enver Hoxhaj ka folur për media rreth formimit të Qeverisë që pritet të votohet sot pasdite.

Ai ka thënë që PDK-ja do të luajë rolin e opozitës dhe do të prezentojë vullnetin e qytetarëve që kanë votuar opozitën, shkruan Periskopi.

“Do ta luajmë rolin e opozitës ashtu siç na obligon Kushtetuta, duke thënë kritikë, duke u munduar që të mos e përmbysim sistemin“, ka thënë Hoxhaj.

Ai ka folur edhe për çështjen e Presidentit, për të cilën ka thënë se PDK-ja nuk do t’i ofrojë vota Vjosa Osmanit për tu zgjedhur Presidente.

“Dua t’ju garantoj që me krenari dhe dinjitet do të përfaqësojmë vullnetin e tyre. Ne presim nga z.Kurti dhe Lëvizjes Vetëvendosje, që të vazhdojë punën pas formimit të Qeverisë. Ne nuk pranojmë që dikush interesat e tyre personale, të na i shesë si interesa nacionale“, ka thënë Hoxhaj.

Ai ka thënë se PDK-ja nuk është e interesuar t’i ndihmojë personat e caktuar për ‘interesat për karrige‘, duke thënë se e vetmja karrige për të cilën ka interes PDK-ja është ulësja në OKB.

Hoxhaj në anën tjetër ka deklaruar se sot seanca konstituive ka ecur mirë dhe nuk ka pasur gaz, duke aluduar në pengesat që Lëvizja Vetëvendosje i bënte para disa vitesh në Kuvendin e Kosovës.

“Sot kishim një senacë konstituive të Kuvendit të ri opas zgjedhjeve të 14 shkurtit, më lejoni të ju them se PDK është parti që reflekton vullnetin e qytetarëve në zgjedhje dhe i respekton qytetarët e Kosovës dhe pas zgjedhjeve. Seanca shkoi mirë, po e shihni nuk pati gaz, tym, as dhunë. Ne I respektojmë qytetarët dhe shtetin. Ne kemi qenë gjatë një parti fituese qeverisës, e kemi respektuar opozitën sikurse do të jemi parti që do ta respektojmë qeverinë. Çdokush duhet ta kuptojë që PDK nuk i nënshtrohet vullnetit të askujt kur është fjala për krijimin e institucioneve të reja dhe nuk e lejojmë askënd që të na e shes sapunin për djathë”, tha ai. /Periskopi