Historia e dashurisë së çuditshme mes Serbisë dhe Palestinës

Marrëdhëniet mes Shtetit të Palestinës dhe Republikës së Serbisë kanë qenë shumë të afërta dhe miqësore. Edhe pse Serbia kishte ri-vendosur marrëdhënie me Izraelin më 1991, marrëdhëniet e saj me Palestinën kishin mbetur të shkëlqyera.

Serbia kishte votuar në favor të Palestinës në disa raste, përfshirë edhe votimin në Asamblenë e Përgjithshme të OKB-së që denonconte vendimin e ShBA-ve për ta çuar ambasadën e saj në Jerusalem.

Historia

Republika Federale Socialiste e Jugosllavisë gjatë kohës së Titos kishte vendosur marrëdhënie diplomatike me Izraelin më 1948. Por, pas luftës Gjashtë-Ditore të 1967-s, Jugosllavia kishte ndërprerë këto marrëdhënie dhe nuk i kishte rivendosur deri më 1991, shkruan Periskopi.

Titoja e kishte mbështetur fuqishëm Yasser Arafatin dhe Organizatën për Çlirimin e Palestinës. Yasser Arafati madje kishte vizituar Beografin pas vdekjes së Titos më 8 maj të vitit 1980.

Jugosllavia e kishte njohur Shtetin e Palestinës më 16 nëntor të vitit 1988 dhe kishte vendosur marrëdhënie të plota diplomatike më 1989.

Në fund të vitit 1999, kur qeveria e Sllobodan Millosheviqit ishte izoluar ndërkombëtarisht shkaku i luftës në Kosovë dhe luftërave të tjera në vendet e tjera ish-jugosllave, autoritetet palestineze e kishin ftuar Millosheviqin të festonte Krishtlindjet Ortodokse në qytetin e Betlehemit. Izraeli e kishte kërcënuar Millosheviqin se do ta dorëzonte në Tribunalin e Hagës nëse kalonte kufirin e kontrolluar nga Izraelitët.

Më 9 qershor të vitit 2015, gjatë vizitës së presidentit Mahmoud Abbas në Beograd, ishte nënshkruar një Memorandum Mirëkuptimi ku palët pajtoheshin të mbanin konsultime të përvitshme për çështjet ekonomike.

Gjatë periudhës 2009-2017, Serbia kishte ofruar më shumë se 70 bursa për studentët palestinezë në disa disiplina të ndryshme.

Serbia vazhdimisht ka denoncuar aksionet ushtarake të Izraelit ndaj palestinezëve gjatë dekadave të fundit. /Periskopi