A mund të rrëzohet Kurti në Kushtetuese? Ja çka thotë Kushtetuta për ankesën e Srpskas

Si gjithnjë, Kushtetuta e Kosovës vazhdon ka zbrazëti të shumta që mundësojnë interpretime të ndryshme për një çështje të vetme, e madje edhe krijimin e precedentëve të rrezikshëm.

Meqë Qeveria Kurti II do t’i ketë 15 ministri, e jo 12 sa i kishte Qeveria Kurti I, Lista Srpska kërkon që kjo parti politike t’i marrë dy ministri dhe jo vetëm një sa i është ofruar.

Goran Rakiq do të jetë ministër për Kthim dhe Komunitete në Qeverinë Kurti II, ndërsa me poste ministrore janë shpërblyer edhe tre politikanë tjerë të komuniteteve pakicë: Emilja Rexhepi [komuniteti boshnjak] Fikrim Damka [komuniteti turk] dhe Elbert Krasniqi [komuniteti egjiptian], shkruan Periskopi.

Pika 3 e Nenit 96 të Kushtetutës së Kosovës që quhet “Ministritë dhe Përfaqësimi i Komuniteteve” shkruan si vijon:

“Në Qeveri do të jenë së paku një (1) Ministër nga komuniteti Serb dhe një (1) Ministër nga

ndonjë komunitet tjetër joshumicë në Kosovë. Nëse janë më shumë se dymbëdhjetë ministra,

Qeveria do të ketë edhe një ministër të tretë, i cili përfaqëson një nga komunitetet joshumicë

në Kosovë.”

Qeveria Kurti II në fakt do t’i ketë katër ministri dedikuar komuniteteve pakicë, por vetëm një dedikuar komunitetit serb.

Kushtetuta e Kosovës garanton ndarje të barabartë të vendeve të rezervuara mes komunitetit serb dhe komuniteteve tjera pakicë jo-serbe në Kuvendin e Kosovës.

Një gjë e tillë mund të përbëj problem për kryeministrin Kurti në Gjykatën Kushtetuese, marrë parasysh edhe që komuniteti serb ka një numër shumë më të madh banorësh se sa komunitetet e tjera pakicë jo-serbe.

Po ashtu, kjo evidentohet edhe në rezultatet e zgjedhjeve të 14 shkurtit, kur Lista Serbe fitoi më shumë vota se sa të gjitha partitë e pakicave marrë së bashku. /Periskopi