Vrasja e Enver Hadrit: Belgjika pezullon fletarrestin për Drashkoviqin

Autoritetet belge kanë pezulluar fletarrestin e kuq të Interpolit për Andrija Drashkoviqin, shtetasin serb të akuzuar për pjesëmarrje në vrasjen e vitit 1990 të aktivistit kosovar Enver Hadri, mësoi hetimi. Fletarresti i kuq u pezullua në fillim të shkurtit ndërsa javën e kaluar u njoftuan të gjitha agjencitë policore. Shpjegimi i dërguar nga autoritetet belge thotë se “kërkimi për Drashkoviqin do të vazhdojë në nivelin kombëtar”, d.m.th. vetëm në territorin e atij shteti.
Pikërisht katër vjet më parë, Gjykata në Bruksel anuloi vendimin e shkallës së parë me të cilin Andrija Drajakoviq, në mungesë, u dënua me burgim të përjetshëm për vrasjen e Hadrit. Përveç Drashkoviqit, ish-oficeri serb i rangut të lartë të SDB-së Bozhidar Spasiq dhe krimineli Veselin Vukotiq u dënuan me burgim të përjetshëm në të njëjtën procedurë. Andrija Drashkoviq është edhe ashtu një kriminel i njohur serb i cili u dënua për vrasjen e Zvonko Pleqiqit. Për dhjetë vjetët e fundit, agjencitë policore kanë pasur një fletarrest të kuq të Interpolit kundër Drashkoviqit në bazat e tyre.

Në qershor të vitit 2015, Drashkoviqi u arrestua në Split në bazë të një fletarresti të Interpolit. Pasi që, me një pagesë prej 100 mijë eurosh, u lirua që ta presë në hotel vendimin nga gjyqësori kroat, Drashkoviq iku një ditë para vendimit të ekstradimit. Në nëntor të vitit 2017, dënimi i shkallës së parë në Belgjikë u revokua dhe u urdhërua një rigjykim. Fletarresti për Drashkoviqin mbeti në fuqi. Megjithatë, ai hyri në BeH i papenguar në qershor të vitit 2019, megjithëse sistemi i Policisë Kufitare u tregoi punonjësve kufitarë në vendkalimin Shepak se ai kishte një fletarrest të vlefshëm të Interpolit nga Belgjika. Përkundër kësaj, anëtarët e Policisë Kufitare të BeH nuk dëshironin ta arrestonin atë.
Kalimin kufitar Shepak afër Zvornikut e kaloi më 3 qershor të vitit 2019 në 11 e 38 minuta, duke përdorur letërnjoftimin e Republikës së Serbisë me numër: 010266402. E kontrolloi oficeri i policisë kufitare Nermin Latifoviq. Me Drashkoviqin në atë kohë ishte edhe shtetasi i BeH Mirosllav Millanoviq, siç dëshmohet nga një fotografi e dokumenteve personale, e shkrepur në kohën e kontrollit të tyre në Shepak. Sipas informacionit të Hetimit, oficerët e policisë kufitare e kanë vërtetuar se ishte lëshuar një fletarrest i Interpolit për Drashkoviqin, por më pas pasoi një telefonatë nga BP qendrore e BeH, pas së cilës Drashkoviq duhej të lirohej për të hyrë lirshëm në territorin e BeH. Kalimi i tij nuk ishte i regjistruar.

“Zyra për Standarde Profesionale dhe Kontroll të Brendshëm të Policisë Kufitare të BeH zhvilloi një procedurë të brendshme kundër zyrtarëve të policisë GPBeH, në lidhje me moslejimin e Andrija Drashkoviqit për të kaluar kufirin shtetëror më 3 Qershor 2019 në Kalimin Ndërkombëtar të Kufirit Šepak. Nuk kishte asnjë provë që zyrtarët e GPBeH shkelën detyrën e tyre zyrtare”, deklaroi Policia Kufitare e BeH.

Siç kuptojmë, punonjësve kufitarë, u është thënë më pas se gjatë kontrollit në bazën e të dhënave IDDEEA, ishte theksuar se Drašković është qytetar i BeH dhe se nuk ka nevojë të privohet nga liria sepse nuk mund të ekstradohet në Belgjikë. Është e vërtetë që emri i Andrija Drashkoviqit ekziston në bazën e të dhënave IDEEA, por thuhet se të gjithë dokumentet e tij të BeH janë të pavlefshme.
Pasaporta e parë e BeH e Andrija Drashkoviqit është lëshuar në vitin 1999. Është shpallur e pavlefshme. Pastaj, në gusht të viti 2004, ai mori letërnjoftimin, patentë shoferin dhe pasaportën e re. Edhe këto dokumente gjithashtu ishin shpallur të pavlefshme, sikur edhe letërnjoftimi i lëshuar në vitin 2005. Dokumentet e BeH të Drashkoviqit u përfshinë në hetim brenda të ashtuquajturës afera CIPS, kur prokurori i huaj i atëhershëm i Prokurorisë së BeH, Heikki Wendorf, arrestoi disa zyrtarë të agjencive policore të BeH, të cilët kishin lejuar kriminelët serbë të marrin në mënyrë të paligjshme shtetësinë e BeH. Sipas hetimit në atë kohë, Drashkoviq u raportua që është lajmëruar fiktivisht në adresën në Brčko, ndërsa një pjesë e dokumenteve iu lëshuan atij në Livno dhe një pjesë në Zvornik. Por kjo lëndë, e hapur dymbëdhjetë vjet më parë, nuk ka përfunduar në Gjykatë. Kështu, Drashkoviq lëvizi lirshëm duke përdorur dokumentet e BeH të cilat ishin lëshuar në mënyrë të paligjshme.

Kush është Enver Hadri?

Enver Hadri ishte kryetar i Komitetit për Mbrojtjen e të Drejtave të Njeriut në Kosovë. Ai u vra më 25 shkurt 1990 në një makinë derisa po priste në një semafor në komunën e Brukselit të Saint-Gilles.
Gjatë shpalljes së vendimit tani të revokuar kundër Andrija Drashkoviqit, Gjykata në Belgjikë arriti në përfundimin se Hadri u vra nga kriminelë nga Beogradi, Vukotiq dhe Drashkoviq, me urdhër të shërbimeve sekrete të atëhershme Jugosllave, në të cilat Bozhidar Spasiq ishte kryeinspektori. Gjykata vendosi që vrasja e Enver Hadrit ishte e motivuar politikisht sepse ai mbronte interesat e shqiptarëve në Kosovë dhe mbrojti pavarësinë e Kosovës./istraga.ba