Mirena: VV të zbardh vdekjen e Astrit Deharit, mos ta imitojë LDK-në që kujtohet veç në kohë fushatash

Konkretisht, Mirena ka kërkuar që kjo parti politike të iniciojë procedurën për krijimin e një komisioni hetimor të Kuvendit për zbardhjen e rrethanave që çuan drejt vdekjes aktivistin e ri të partisë së tyre.

Për një kohë të gjatë, Vetëvendosje ka kërkuar drejtësi për aktivistin e vdekur në rrethana ende të pasqaruara derisa po mbahej në paraburgim në Prizren – për rastin e gjuajtjes me granatë dore të Kuvendit të Kosovës.

Madje, Mirena ka propozuar që Avni Dehari të bëhet kryetar i këtij komisioni – meqë ka fituar votat e nevojshme për t’u bërë deputet në Kuvendin e Kosovës. Avni Dehari është babai i Astrit Deharit, raporton Periskpoi.

“Shpresoj, s’do ta imitojnë LDK’në që vetëm në kohë fushatash elektorale kujtohej për aktivistët e tyre të vrarë në rrethana ende misterioze…” – ka shkruar ai.

Statusi i plotë:

Sapo të nisë punën legjislatura e re e Kuvendit të Kosovës, VV’ja duhet të iniciojë procedurën për krijimin e një komisioni hetimor parlamentar për zbardhjen e rrethanave në të cilat ka vdekur Astrit Dehari. Meqë Avni Dehari është zgjedhur deputet për Kuvendin e Kosovës, nga radhët e VV’së, ai duhet të zgjidhet edhe kryetar i këtij komisioni.

Po ashtu, VV’ja pritet të ketë edhe Ministrinë e Punëve të Brendshme dhe atë të Drejtësisë, prandaj me gjithë këtë pushtet që ata do ta kenë, e kanë për obligim që përfundimisht të zbardhin rastin tragjik të Astrit Deharit.

Shpresoj, s’do ta imitojnë LDK’në që vetëm në kohë fushatash elektorale kujtohej për aktivistët e tyre të vrarë në rrethana ende misterioze…