Lista Serbe: Akuzat ndaj Vuçiqit janë krijuar si marrëveshje e opozitës në Serbi dhe Kurtit

“Pretendimi i rremë se Lista Serbe, shteti i Serbisë dhe presidenti i saj Aleksandar Vuçiq kanë lidhje me rrahjen e planifikuar më herët midis dy grupeve djemsh, njëri prej të cilëve është djali i Nenad Rashiqit, është planifikuar midis Albin Kurtit dhe të ashtuquajturës opozitë në Serbi  të tubuar rreth Dragan Gjillasit dhe servilëve të tij, Vuk Jeremiq, Mllagjan Gjorgjeviq dhe të tjerët”, pretendohet në një kumtesë të lëshuar nga Lista Serbe.

Përfaqësuesit e Listës Serbe pretendojnë se, kur deklaratat e tyre krahasohen, ato padyshim janë bërë në të njëjtin vend, në shërbimin “PR” (Marrëdhëniet me publikun) të Albin Kurtit dhe Vjosa Osmanit.

“Ajo që është veçanërisht e neveritshme është se më shumë reagime të ekipit të Gjillasit u shkaktuan për rrahjen e një djali sesa për qindra sulme të tjera ndaj serbëve dhe fëmijëve serbë prindërit e të cilëve nuk janë politikanë të afërt me Albin Kurtin. Për më tepër, kujdesi i Gjillasit dhe Jeremiqit nuk u tregua për fëmijët serbë nga Kosova kur ata fëmijë dhe prindërit e tyre u persekutuan në masakrën e marsit 2004”, shtohet në kumtesë.

Përfaqësuesit e Listës Serbe gjithashtu përkujtojnë se si, “e ashtuquajtura opozitë e Serbisë, nuk ka reaguar me rastin e vrasjes së fëmijëve serbë në Gorazhdec”.

“Si është e mundur që askush nga udhëheqësit e të ashtuquajturës opozitë të Serbisë, ose përfaqësuesit ndërkombëtarë, nuk shtypën asnjë një germë me rastin e përvjetorit të vrasjes së fëmijëve të pafajshëm serbë në Gorazhdec, në lumin Bistrica, duke kërkuar që të dënohen ata që janë përgjegjës, por këto ditë ata janë shumë aktivë, sikur edhe kuzhina e partive politike shqiptare në Kosovë, në përndjekjen politike të Vuçiqit dhe Listës Serbe sepse ne nuk ndajmë vizionin politik të Gjillasit dhe Rada Trajkoviqit se serbët do të kenë më mirë në një Shqipëri të Madhe, e çka Lista Serbe dhe populli serb nuk do të pranojnë kurrë“, pretendohet në kumtesën e Listës Serbe