Albin Kurti shpreh keqardhje të madhe për rrahjen e djalit të Nenad Rashiqit

Kurti ka shprehur keqardhje të madhe për rrahjen e tij dhe ka thënë se sulmi ndaj djalit të Rashiqit është si pasojë e mos nënshtrimit ndaj kërcënimeve të Serbisë, shkruan Periskopi.

Tutje, Kurti ka theksuar se Qeveria e tij në ardhje, do të punojë që qytetarët pa dallim përkatësie të jetojnë të sigurtë.

Reagimi i plotë i Kurtit:

Me keqardhje të madhe morëm lajmin se sot në Graçanicë, djaloshi 18 vjeçar, Nikolla Rashiq, u rrah brutalisht me armë të ftohta. Nikolla është i biri i Nenad Rashiqit, politikanit demokrat e të mirënjohur serb në Kosovë.

Duket se ky krim banditesk ndaj Nikolla Rashiqit është i organizuar dhe ka të bëjë me prindin e tij që nuk u thye e as s’u nënshtrua ndaj trysnisë e kërcënimeve të Serbisë. Me gjasë, meqë nuk e frikësuan dot Nenad Rashiqin, ia rrahën të birin Nikollën.

Në qeverinë tonë të re do të punojmë që të gjithë qytetarët e Kosovës pa dallim përkatësie kombëtare të jetojnë të sigurtë.

Kërkoj që organet e rendit urgjentisht ta zbardhin këtë rast dhe kriminelët të përgjigjen para drejtësisë, ndërkaq Nikollës i uroj shërim të plotë e të shpejtë.